09 اگست ، 2021
بالی وڈ فلم اور ٹیلی ویژن انڈسٹری سے تعلق رکھنے والے معروف بھارتی اداکار انوپم شیام 63 برس کی عمر میں انتقال کرگئے۔
بھارتی میڈیا رپورٹس کے مطابق انوپم شیام کے کئی اعضاء نے کام کرنا چھوڑ دیا تھا، ان کے انتقال کی تصدیق انوپم شیام کے دوست یشپال شرما اور پروڈیوسر اشوک پنڈت کی جانب سے کی گئی۔
بھارتی میڈیا سے گفتگو کرتے ہوئے یشپال شرما کا کہنا تھا کہ انوپم شیام گزشتہ 4 روز سے ممبئی کے ایک اسپتال میں داخل تھے، وہ ہائی شوگر کے مرض میں مبتلا تھے جب کہ اپنی آخری فلم کی شوٹنگ کے دوران بھی انوپم شیام انجیکشن لیتے رہے تھے۔
خیال رہے کہ انوپم شیام کو آخری مرتبہ بھارتی ڈرامہ سیریل من کی آواز پرتگیا 2 میں دیکھا گیا، انہوں نے سلم ڈوگ ملینیئر، بینڈتھ کوئن، دل سے، لگان اور ہزاروں خواہشیں ایسی سمیت کئی فلموں میں کام کیا ۔