بلاگ

ڈی جی آئی ایس آئی کی تقرری اور عمران خان

23 اکتوبر ، 2021

ڈی جی آئی ایس آئی جنرل فیض حمید آرمی چیف جنرل قمر جاوید باجوہ کے دست راست اور عمران خان کے ٹربل شوٹر کی حیثیت رکھتے ہیں۔ چنانچہ دونوں کی یہ مشترکہ خواہش تھی کہ وہ اگلے سال آرمی چیف کے لئے کوالیفائی کرنے والے چار سینئر لیفٹیننٹ جنرلز کی فہرست میں شامل ہوں۔

آرمی کی روایات اور اب نئے آرمی رولز کے مطابق یہ ضروری ہے کہ انہوں نے کم ازکم ایک سال کور کمانڈ کیا ہو۔ چنانچہ آرمی چیف نے اس معاملے پر عمران خان سے مشاورت جولائی میں شروع کی تھی۔ عمران خان نے پہلے یہ تجویز دی کہ آئی ایس آئی کو کور بنادیا جائے لیکن انہیں بتایا گیا کہ ایسا ممکن نہیں۔

اب وزیراعظم کی حیثیت سے عمران خان اپنا حق جتاتے ہیں لیکن آئی ایس آئی کا کور بن جانے کی صورت میں وہ صرف اور صرف آرمی چیف کے زیرکمانڈ رہتا اور اس سے وزیراعظم کا تعلق یکسر ختم ہوجاتا۔

یہ بھی پڑھیں

پھر انہوں نے یہ خواہش ظاہر کی کہ دسمبر تک انہیں رکھاجائے لیکن آرمی چیف نے ان پر دوبارہ واضح کیا اور خود جنرل فیض حمید نے بھی انہیں سمجھایا کہ اگر وہ دسمبر میں جائیں گے تو اگلے سال نومبر میں ان کے کورکمانڈ کرنے کی ایک سال کی مدت پوری نہیں ہوئی ہوگی۔ ان سے یہ بھی پوچھا گیا کہ جنرل فیض حمید کی جگہ ان کے ذہن میں اگر کوئی متبادل نام ہے تو وہ بتائیں لیکن ان کا جواب تھا کہ وہ آرمی چیف اور جنرل فیض حمید کے سوا آرمی کی صفوں میں کسی اور جنرل کو نہیں جانتے۔

چنانچہ اس کے بعد اپنے نظام کے مطابق آرمی چیف نے تقرریوں اور تبادلوں کا آغاز کیا اور ستمبر کے اواخر میں یہ فائنل ہوگیا کہ کون کہاں جائے گا؟ خود جنرل فیض حمید نہ صرف مکمل آن بورڈ تھے بلکہ پشاور جانے کے فیصلے پر خوش بھی تھے۔ اعلان سے قبل وہ پشاور کا ایک دورہ بھی کرچکے تھے۔اعلان سے قبل وزیراعظم تو کیا ہم جیسے صحافیوں کو بھی علم تھا کہ جنرل فیض حمید پشاور جارہے ہیں اور ان کی جگہ جنرل ندیم انجم ڈی جی آئی ایس آئی بن رہے ہیں۔

وزیراعظم کو یہ بھی بتایا گیا تھا کہ اکتوبر کے پہلے ہفتے میں یہ کام ہونے جارہا ہے اور بعض صحافی یہ خبر بھی دے چکے تھے کہ فلاں تاریخ کو کورکمانڈر میٹنگ ہوگی اور اس کے اگلے دن آرمی چیف اور وزیراعظم کی ملاقات کے بعد نئی تقرریوں کا اعلان ہوگا۔ٹیلی فونک رابطوں کے علاوہ آئی ایس آئی ہیڈکوارٹر میں بریفنگ کے دوران بھی عمران خان اور جنرل باجوہ اکٹھے شریک رہے لیکن کسی بھی موقع پر عمران خان نے کوئی سوال نہیں اٹھایا۔

چنانچہ 6 اکتوبر کو جب آرمی چیف عمران خان سے ملنے کے لئے جارہے تھے تو ان کے وہم وگمان میں بھی نہیں تھا کہ ان کی طرف سے کوئی اعتراض اٹھایاجاسکتا ہے۔ڈی جی آئی ایس آئی کے علاوہ باقی پوسٹنگز سے چونکہ وزیراعظم کا کوئی تعلق نہیں بنتا تھا ، اس لئے ان کی پریس ریلیز آئی ایس پی آر نے پہلے جاری کردی جبکہ ڈی جی آئی ایس آئی کے اعلان کے لئے دو بڑوں کی ملاقات کا انتظار ہونے لگا۔ لیکن پراسرار طور پر خان کا ذہن رات کو یوٹرن کھاچکا تھا تاہم بجائے اس کے کہ وہ آرمی چیف سے صاف کہتے کہ فلاں جگہ اور فلاں وجہ سے ان کی سوچ بدلی ہے ، وہ الٹا بچوں کی طرح ناراض ہوئے۔

دوسری طرف آرمی چیف چونکہ مطمئن تھے کہ سب تقرریوں پر عمران خان کو کوئی اعتراض نہیں اور یہ کہ سب معاملات میں وہ آن بورڈ ہیں، اس لئے ڈی جی آئی ایس آئی کی پریس ریلیز کو بھی پائپ لائن میں رکھا گیا تھا اور ملاقات ہوتے ہی آئی ایس پی آر نے ان کی تعیناتی کی پریس ریلیز بھی جاری کردی۔

ادھر عمران خان نے اپنی میڈیا ٹیم کے ذریعے تنازعے اور اپنی ناراضی کی خبر لیک کرادی اور ساتھ ہی کورکمیٹی اور کابینہ کی کمیٹی برائے قومی سلامتی کا اجلاس طلب کرکے یہ خبر پھیلادی کہ وہ ان فورمز پر اس ایشو کو ڈسکس کریں گے۔

آرمی چیف اور عمران خان کی ملاقات میں تلخی کی خبر سن کر خود جنرل فیض حمید ثانی الذکرکے پاس پہنچےاور سمجھا بجھا کر انہیں بتایا کہ وہ کورکمیٹی اور قومی سلامتی کمیٹی میں لے جاکر اس تنازعے کو طول نہ دیں۔ دونوں فورمزپر ڈسکس نہ کرنے کی حد تک تو انہوں نے جنرل فیض حمید کا مشورہ مان لیا لیکن نوٹیفکیشن کے لئے تیار نہ ہوئے۔

ان کا خیال تھا کہ ماضی کی طرح تنازعہ بنا کر وہ عسکری اداروں کو دبائو میں لے آئیں گے اور آخرمیں مان لیا جائے گا کہ چلو ٹھیک ہے آپ جو چاہتے ہیں کر لیں لیکن انہوں نے یہ نہیں سوچاکہ ماضی کی طرح یہ سیاست کا نہیں بلکہ فوج کے ادارے کے ڈسپلن، روایات اور وقار کا مسئلہ ہے۔ اسی طرح ایک طرف اگر ان کی خواہش تھی تو دوسری طرف پورے ادارے کا وقار تھا۔ جنرل فیض حمید نے دو تین دن تک شٹل ڈپلومیسی کی لیکن جب عمران خان بات نہ مانے تو انہوں نے یہ پیغام دیا کہ وہ مقررہ تاریخ پر پشاور کے کورکمانڈر کے طور پر چارج لینے جائیں گے اور اگر انہیں روکا گیا تو وہ مستعفی ہوجانے کو ترجیح دیں گے۔ چنانچہ عمران خان کے پاس کوئی راستہ نہیں رہا ، سوائے اس کے کہ جو فیصلے ہوئے ہیں، انہی پرہاں کردیں۔

خود عمران خان کے دور میں پہلے لیفٹیننٹ جنرل عاصم منیر اور پھر لیفٹیننٹ جنرل فیض حمید کا جب بطور ڈی جی آئی ایس آئی تقرر ہوا تو اس سلسلے میں وزیراعظم کے پاس نہ تو تین ناموں کی سمری آئی اور نہ انٹرویوز ہوئے۔ دونوں مرتبہ آرمی چیف نے فیصلہ کرکے آئی ایس پی آر سے اعلان کروایا۔ چنانچہ اب عمران خان بند گلی میں پھنس گئے ہیں۔ اپنے لئے فیس سیونگ کا راستہ ڈھونڈ رہے ہیں لیکن دوسری طرف فوج اور آئی ایس آئی کو بھی بند گلی میں لے گئے ہیں کیونکہ ایک ایک دن کیا، ایک ایک گھنٹہ فوج کے امیج اور وقار کے لئے بھاری ثابت ہورہا ہے۔

وزیراعظم نے آرمی چیف سے بھی وعدہ کیا ہے اور ثالثی کرنے والے اپنے وزرا سے بھی کہ وہ جنرل ندیم انجم کے نام ہی کی منظوری دیں گے لیکن جب ان سے دستخط کا تقاضا کیا جاتا ہے تو عمران خان چند روز صبر کا کہتے ہیں لیکن اس صبر کی منطق نہ وہ اپنے وزرا کے سامنے پیش کرسکتے ہیں اور نہ ان کے وزرا قوم کو سمجھا سکتے ہیں۔

ان حالات میں جب میڈیا والے قیاس کرتے ہیں یا پھر خود ان کے اردگرد لوگوں اور وزرا کی فراہم کردہ اطلاعات کے مطابق کسی اور دنیا کی طرف اشارہ کرتے ہیں تو ان کے وزرا اور سوشل میڈیا بریگیڈ گالم گلوچ اور دشنام طرازی پر اتر آتے ہیں۔

جیو نیوز، جنگ گروپ یا اس کی ادارتی پالیسی کا اس تحریر کے مندرجات سے متفق ہونا ضروری نہیں ہے۔