بھارتی اداکار کی آنکھیں بعد از مرگ عطیہ کردی گئیں

چند روز قبل دل کا دورہ پڑنے سے انتقال کرنے والے ساؤتھ انڈین اداکار پنیت راج کمار کی آنکھیں بینائی سے محروم افراد کو عطیہ کردی گئیں۔

بھارتی میڈیا رپورٹس کے مطابق زندگی میں سماجی کاموں میں پیش پیش رہنے والے آنجہانی اداکار کی آنکھوں سے 4 افراد کی بینائی واپس آئی جن میں 3 مرد اور ایک خاتون شامل ہیں تاہم اسپتال انتظامیہ کی جانب سے متعلقہ افراد کی شناخت ظاہر نہیں کی گئی ہے۔

بھارتی اداکار پنیت راج کمار دل کا دورہ پڑنے سے انتقال کرگئے

46 سالہ پنیت راج کمار ساؤتھ انڈین فلموں کے معروف اداکار تھے اور انہیں پاور اسٹار کے نام سے جانا جاتا تھا۔

اداکار کی آنکھیں ایڈوانس ٹیکنالوجی کے تحت چار افراد کو عطیہ کی گئیں، اس تکنیک کے تحت آنکھ کے کورنیا کو دو حصوں میں تقسیم کیا جاتا ہے جس کے بعد اس کا ہر حصہ مختلف مریضوں کو عطیہ کردیا جاتا ہے۔

رپورٹس کے مطابق بھارتی شہر بنگلورو کے آنکھوں کے اسپتال 'نارایانا نیتھرالیا' کے چیئرمین ڈاکٹر بھجنگ شیٹی نے بتایا کہ یہ تکنیک ریاست کرناٹکا میں پہلی بار استعمال کی گئی جس میں آنکھوں کو بیک وقت چار لوگوں کو عطیہ کیا گیا۔

واضح رہے کہ اداکار پنیت راج کمار جِم میں ورزش کے دوران اچانک گرپڑے تھے جس پر انہیں فوری طور پر اسپتال لے جایا گیا جہاں ڈاکٹرز نے انہیں آئی سی یو منتقل کیا تاہم وہ دم توڑ گئے۔