کیا ہم ریوڑ ہیں؟

06 نومبر ، 2021

ہمارے بائیس کروڑ عوام میں سے چند لاکھ ضرور امیر ہوں گے باقی ہم کروڑوں تو غریب ہیں جن میں اگر کچھ امیر تھے بھی تو حکومت نے انہیں کھینچ کر غریبوں میں پھینک دیا ہے اب ہماری ایماندار حکومت نے ان غربا کے لئے ایک ارب بیس کروڑ روپے کا ریلیف پیکیج جاری فرمایا ہے اور جو امیر سیٹھ لوگ ہیں انہیں بھی تلقینِ شاہی ہے کہ اپنے منافع بخش کاروبار سے کچھ خیرات نکال کر غربا کو اچھی اور گرم چائے پلا دیا کریں ہو سکے تو مہینے میں ایک دو بار انہیں کھانابھی کھلا دیا کریں، کھانا کھا کر یہ الحمد للہ کہتے، دانتوں میں خلال کرتے کم از کم حکومت کو بددعائیں دیں گے نہ زبان طعن دراز کریں گے، حکومت نےبھی تو اس مقصد کے تحت لنگر خانوں کا جال بچھا رکھا ہے۔

آپ دیکھیں گے کہ اس ریلیف پیکیج کی برکت سے آئندہ چھ ماہ میں کس تیزی سے ہماری ڈوبی ہوئی معیشت اوپر اٹھتی ہے۔ آٹا، دال اور گھی پر اکٹھی تیس فیصد سبسڈی سے عوام کی آنکھیں ہی نہیںکھُلیں گی باچھیں بھی کھلِ جائیں گی۔ یقیناً اس خطیر رقم سے محض 13کروڑ نہیں 23کروڑ عوام پورے دو سال تک مستفید ہوتے رہیں گے، چالیس لاکھ خاندانوں کے لئے ہم جلد بلاسود قرضوں کا پروگرام بھی دینے جا رہے ہیں ۔

میرے پاکستانیو! آج اگر ہمیں پٹرول مزید آٹھ روپے مہنگا کرناپڑا ہے یا چینی ایک سو پچاس روپے کلو تک پہنچ گئی ہے تو اس مہنگائی کی وجہ ہم نہیں سابقہ حکومتیں تھیں، اگر آپ تحریک انصاف کی نظر سے دیکھو تو یہ مہنگائی کوئی زیادہ نہیں، اپنے ہمسایہ دیگر ممالک سے موازنہ کرو تو یہ مہنگائی کچھ بھی نہیں، مہنگائی تو ہندوستان کیا امریکا میں بھی بہت بڑھی ہے، پوری دنیا میں بڑھی ہے لیکن جتنی ہم نے کی ہے وہ کچھ بھی نہیں ہے، اس لئے کہ ہمیں عوامی غربت اور دکھوں کا احساس ہے۔ اس تھوڑی سی مہنگائی سے بھی آپ نے گھبرانا شروع کردیا ہے۔

اپوزیشن آپ کو خواہ مخواہ ڈراتی رہتی ہے، اپوزیشن کا تو کام ہی یہ ہے لیکن ہمارے آزاد میڈیا کو اس سلسلے میں تعاون کرنا چاہیے، آپ لوگ اگر مائیک لے کر عوام کے پاس جائیں گے تو لازمی بات ہے وہ مہنگائی کا رونا دونا شروع کردیں گے، حب الوطنی کاتقاضا ہے کہ آپ عوام کے پاس جائیں ہی مت، حکومت وقت کے ساتھ تعاون کا ہاتھ بڑھاتے ہوئے خود ہی لکھ دیا کریں کہ سب اچھا ہے، اگر ہماری ذمہ دار صحافت اس قومی مفاد اور ذمہ داری کا احساس کرے تو پاکستان میں کہیں بھی کسی کو کوئی برائی یا خامی نظر نہ آئے۔

ایمانداری کے ساتھ آگے بڑھنا اور ترقی کرنا جان جوکھوں کا کام ہوتا ہے آپ تو تھوڑی سی مہنگائی سے گھبرا گئے ہیں جبکہ میں آپ کو بتاتا ہوں آگے سردیاں آنے والی ہیں ان سردیوں میں ہم عوامی ڈیمانڈ کے مطابق گیس مہیا کرنے سے یقیناً قاصر رہ جائیں گے لہٰذا مجبوراً ہمیں گیس کی قیمتیں بھی تیل کی طرح بڑھانا پڑیں گی، کوئی نہیں آپ صرف دو سال مزید تنگی کے گزار لیں اس کے بعد میرا وعدہ ہے کہ یہاں لہریں بہریں ہو جائیں گی۔

آپ دیکھیں ہم نے کے پی میں اربوں درخت لگائے ہیں، اپوزیشن اتنی نااہل ہے اس میں گنتی کرنے کی صلاحیت ہی نہیں ، بس الزام بازی ہے کہ درخت کم لگے ہیں۔ جو دو خاندان پچھلے تیس سالوں سے ملک کو لوٹ رہے ہیں میں ان دونوں خاندانوں کی خدمت میں درخواست کرتا ہوں کہ اپنی دولت واپس لے آئیں میں اشیائے خورد و نوش کی قیمتیں آدھی کردوں گا یہ میرا قوم سے پکا وعدہ ہے، اس پر کوئی زبان دان مجھے اس نوع کا محاورہ سنانے کی کوشش نہ کرے کہ ’’نہ ہوگا نو من تیل نہ رادھا ناچے گی‘‘ ورنہ ہم مراد سعید کو سامنے لے آئیں گے جو تین برس قبل کہتا تھا کہ میرا کفتان حکومت میں آئے گا اور اگلے روز لوٹے گئے دو ارب ڈالر واپس لائے گا، ایک ارب بیرونی قرضوں کی ادائیگی کے لئے ان کے منہ پر مارے گا دوسرا ارب عوام میں بانٹ دے گا لیکن کیا کریں مغربی عدالتی نظام بھی بڑا کرپٹ ہے،مجھ سے زیادہ اسے کوئی نہیں جانتا وہ جس نوع کے پکے ثبوت مانگتے ہیں وہ ہم کہاں سے لائیں؟

جیو نیوز، جنگ گروپ یا اس کی ادارتی پالیسی کا اس تحریر کے مندرجات سے متفق ہونا ضروری نہیں ہے۔