کراچی میڈیکل اینڈ ڈینٹل کالج کے ہاؤس ڈاکٹرز کا تنخواہیں نہ ملنے پر مظاہرہ

چھ ماہ سے تنخواہیں نہ ملنے پر کراچی میڈیکل اینڈ ڈینٹل کالج کے ہاؤس ڈاکٹرز نے احتجاجی مظاہرہ کیا۔

کے ایم ڈی سی کی او پی ڈی میں ڈیوٹی دینے والے ہاؤس آفیسر ڈاکٹرز کا کہنا ہے کہ کورونا الاؤنس کی مد میں دس ہزار روپے بھی نہیں دیے گئے۔

کراچی پریس کلب کے سامنے سندھ حکومت اور ضلعی حکومت کے خلاف شدید نعرے بازی کی۔

انہوں نے کہا کہ تنخواہ 45 ہزار روپے ہے ، مگر فروری سے اپریل تک پندرہ ہزار روپے کم یعنی تیس ہزار روپے دیے گئے، اپریل کے بعد سے اب تک چھ ماہ کی تنخواہ سرے سے دی ہی نہیں گئی۔

ڈاکٹرز کے مطابق کورونا الاؤنس کی مد میں دس ہزار روپے بھی اب تک ادا نہیں کیے گئے ، یہ صورت حال کسی طرح بھی قابل قبول نہیں۔

مظاہرین نے حکومت سے مطالبہ کیا کہ ان کے واجبات فوری طور پر ادا کیے جائیں۔