میرا دل پاکستانی ٹیم کے ساتھ جڑا ہے، ہیڈن کا اردو میں پیغام

ٹی ٹوئنٹی ورلڈکپ کے دوران قومی ٹیم کے بیٹنگ کنسلٹنٹ کے فرائض انجام دینے والے سابق آسٹریلوی بلے باز میتھیو ہیڈن نے گرین شرٹس کے لیے اردو میں پیغام جاری کیا ہے۔

میتھو ہیڈن نے سوشل میڈیا پر اردو میں جاری پیغام میں پاکستان کو سلام لکھا۔

سابق آسٹریلوی بلے باز نے اپنے ٹوئٹ میں مزید لکھا کہ میں برسبین کے قرنطینہ سینٹر میں بیٹھا اپنی آئسولیشن مکمل کر رہا ہوں مگر میرا دل ڈھاکہ میں موجود پاکستان کرکٹ ٹیم کے تمام کھلاڑیوں اور سپورٹ اسٹاف کے ساتھ جڑا ہے۔

میتھیو ہیڈن نے اپنے پیغام میں یہ بھی لکھا کہ میری تمام تر نیک تمنائیں پاکستان کرکٹ ٹیم کے ساتھ ہیں، شاباش لڑکو! چھا جاؤ۔  

اپنے پیغام کے آخر میں میتھیو ہیڈن نے پاکستان زندہ باد بھی لکھا۔

سوشل میڈیا پر میتھیو ہیڈن کے اردو میں پیغام کو چند ہی منٹوں میں ہزاروں لائکس مل چکے ہیں اور اس پیغام کو  ری ٹوئٹ کیا جا چکا ہے۔