امریکا میں تیز رفتار کار کرسمس پریڈ کے شرکا پر چڑھ دوڑی، 5 افراد ہلاک

امریکی ریاست وسکانسن کے شہر مل واؤکی  کے قریب ایک شخص نے کرسمس پریڈ کےشرکا پر تیز رفتار گاڑی چڑھا دی جس سے 5 افراد ہلاک ہوگئے۔

غیر ملکی میڈیا کا بتانا ہےکہ واقعہ مقامی وقت کے مطابق شام پونے 5 کے قریب مل واؤکی شہر کے قریب واؤکیشا ٹاؤن میں پیش آیا جس میں لال رنگ کی اسپورٹس کار کرسمس پریڈ کے شرکا پر چڑھ دوڑی۔

پولیس حکام کے مطابق واقعے میں 40 افراد زخمی ہیں جن میں 12 بچے بھی شامل ہیں جب کہ واقعے میں اموات بھی ہوئی ہیں تاہم لواحقین کو آگاہ کرنے کے بعد میڈیاکو معلومات فراہم کی جائیں گی۔

پولیس کا کہنا ہےکہ سرخ رنگ کیSUV گاڑی کو تحویل میں لےلیاگیا ہے اور  ڈرائیور کو گرفتارکر کے تفتیش کی جار ہی ہے، واقعے کی تمام پہلوؤں سے تحقیقات کی جارہی ہے۔

دوسری جانب وائٹ ہاؤس سے جاری بیان میں کہا گیا ہےکہ وائٹ ہاؤس اس واقعے کے بعد واؤکیشا شہر کی صورتحال کو قریب سے مانیٹر کررہا ہے اور ریاستی حکام کو ہر تعاون کی یقین دہانی بھی کرائی گئی ہے جب کہ واقعے سے صدر جوبائیڈن کو بھی آگاہ کردیا گیا ہے۔