پاکستان
Time 29 نومبر ، 2021

آئی ایم ایف کی شرائط پر منی بجٹ قومی سلامتی کیلئے خطرہ ہے: شہباز شریف

اسلام آباد: مسلم لیگ ن کے صدر اور قائد حزب اختلاف شہباز شریف کا کہنا ہے کہ آئی ایم ایف کی شرائط پر ایک اور منی بجٹ سے حکومت پھر جھوٹی ثابت ہو گئی ہے۔

اپنے ایک بیان میں شہباز شریف کا کہنا تھا کہ قوم کے مفادات کے تحفظ میں حکومت نے مجرمانہ کردار ادا کیا ہے، آئی ایم ایف کی شرائط پر منی بجٹ لانے کی اطلاع پاکستان کی قومی سلامتی کیلئے خطرہ ہے۔

انہوں نے کہا کہ بار بار خبردار کر چکا ہوں کہ یہ حکومت پاکستان کی معاشی خودمختاری کے خلاف سازش ثابت ہوئی، منی بجٹ کے ساتھ اسٹیٹ بینک اور جی ایس ٹی سے متعلق قانون سازی کی جا رہی ہے، یہ پاکستان کو آئی ایم ایف کا معاشی غلام اور گورنر کو آئی ایم ایف کا وائسرائے بنا دے گی۔

صدر مسلم لیگ ن نے کہا کہ آئی ایم ایف کی موجودہ شرائط کے نتائج خطرناک ہو سکتے ہیں، پاکستان کی دفاعی صلاحیت اور مستقبل میں حکومتی نظام مفلوج ہو جانے کے خدشات ہیں، منی بجٹ لانے کے بجائے عمران نیازی استعفیٰ دیں۔

ان کا کہنا تھا کہ حکومت کی اتحادی جماعتوں کو قومی مفاد میں منی بجٹ کے خلاف کھڑا ہونا چاہیے، منی بجٹ منظور ہونے کا مطلب پاکستان اور عوام کے مستقبل پر غلامی کی مہر لگانا ہے۔

قائد حزب اختلاف کا کہنا تھا کہ متحدہ اپوزیشن سے مل کر پاکستان اور عوام دشمن منی بجٹ اور قانون سازی کا مقابلہ کریں گے، حکومت کا راستہ روکیں گے۔

انہوں نے مزید کہا کہ منی بجٹ مہنگائی سے بدحال قوم کیلئے موت کا پروانہ ہے، منی بجٹ سے پیٹرول بجلی گیس مزید مہنگی ہو گی، قوم کا زندگی گزارنا مزید ناممکن ہوگا۔

ان کا یہ بھی کہنا تھا کہ غربت ظلم کی حدیں عبور کرچکی ہے، ٹیکس میں اضافے سے کاروبار مزید ختم اور معیشت کا حجم مزید سکڑ جائے گا۔

شہباز شریف نے کہا مہنگائی کی قیامت برپا ہو چکی، ظالم حکومت سے نجات ہی قوم کیلئے راہ نجات ہے۔

مزید خبریں :