3 ارب ڈالر رکھوانے کیلئے سعودی عرب اور پاکستان کے درمیان ڈپازٹ معاہدہ طے پاگیا

سعودی عرب اور پاکستان کے درمیان ڈپازٹ معاہدہ طے پاگیا۔

اسٹیٹ بینک آف پاکستان کے مطابق سعودی عرب اور پاکستان کے در میان ایک ڈپازٹ معاہدے پر آج دستخط کیے گئے جس میں سعودی عرب کی نمائند گی سعودی فنڈ براۓ ترقی اور پاکستان کی نمائند گی اسٹیٹ بینک نے کی۔

اعلامیے میں کہا گیا ہے کہ معاہدے پر سعودی فنڈ کے چیف ایگز یکٹو آفیسر سلطان بن عبد الرحمن المرشد اور گورنر اسٹیٹ بینک ڈاکٹر رضا باقر نے کراچی میں دستخط کیے۔

اعلامیے کے مطابق ڈپازٹ معاہدے کے تحت سعودی فنڈ اسٹیٹ بینک کے پاس 3 ارب ڈالرز رکھوائے گا اوریہ رقم اسٹیٹ بینک کے زر مبادلہ ذخائر کا حصہ بن جائے گی، یہ رقم ملکی زر مبادلہ ذخائر میں معاونت کرے گی اور کو رونا وبا کے منفی اثرات دور کرنے میں مددگار ثابت ہو گی۔

اعلامیے کے مطابق ڈپازٹ معاہدہ مضبوط اور خصوصی تعلقات کا عکاس ہے اور یہ دونوں برادر ممالک کے مابین اقتصادی تعلقات کو فروغ دے گا۔

خیال رہے کہ وزیراعظم کے حالیہ دورہ سعودی عرب کے بعد وفاقی وزیر اطلاعات و نشریات فواد چوہدری نے بتایا تھا کہ سعودی عرب نے پاکستان کو 3 ارب ڈالرز کے سپورٹ فنڈ کا اعلان کیا ہے، یہ رقم سعودی فنڈ برائے ترقی اسٹیٹ بینک آف پاکستان میں جمع کرائے گا۔

فواد چوہدری کا کہنا تھا کہ اس کے علاوہ سعودی عرب ایک سال کے دوران ریفائنڈ پیٹرولیم مصنوعات کی مد میں 1.2 ارب ڈالرز کی فنانسنگ بھی فراہم کرے گا۔