واردات کی گواہی، واردات سے پہلے

سچے کھرے اور بےلاگ انصاف کی نشانی یہ ہوتی ہے کہ ملزم جونہی مجرم قرار پاتا اور کیفر کردار تک پہنچتا ہے کہانی تمام ہو جاتی ہے،  بس تاریخ کے اوراق میں عبرت کی ایک داستان باقی رہ جاتی ہے، نہ کسی کی طرف اُنگلیاں اٹھتی ہیں اور نہ کسی جج کی دستارِ فضیلت پر کوئی ہاتھ پڑتا ہے،  نہ کسی کی مظلومیت کا تاثر ابھرتا ہے اور نہ کسی سازش کی کہانیاں گردش کرتی ہیں،  نہ گاؤں گوٹھوں کی چوپالوں سے لے کر ملکی اور بین الاقوامی اداروں تک جرم و سزا اور قانون و انصاف کے بخیے ادھیڑے جاتے ہیں۔

 اگر لگ بھگ نصف صدی پہلے پھانسی چڑھا دیے جانے والے وزیراعظم ذوالفقار علی بھٹو کی داستان انصاف آج بھی زندہ ہے اور 4  برس پہلے بیٹے کی کمپنی سے طے شدہ تنخواہ وصول نہ کرنے کے جرم قبیح میں عمر بھر کے لیے سیاست سے بیدخل کر دیے جانے والے نواز شریف کا تذکرہ ختم ہونے میں نہیں آرہا تو جان لیجئے کہ نصف صدی بعد دہرایا گیا یہ ڈرامہ بھی ہماری سیاست کو نکیل ڈالنے والے انہی منہ زور موسموں کا کرشمہ ہے جو ہمیشہ بڑے کارگر اور موثر رہے ہیں۔ 

خلقِ خدا کسی عدالتی فیصلے کو تقاضائے انصاف سمجھ کر مطمئن ہو جائے تو جان لو کہ مجرم بجا طور پر کیفر کردار کو پہنچا اور اگر سزا کسی کو ملے اور جرم کا کھرا کسی اور گھر جاتا ہو اور ترازو بدست قبیلہ کھیل کا حصہ نظر آئے تو خلقِ خدا اسی طرح مضطرب رہتی ہے، رسوائیوں کی داستان اسی طرح دائرہ در دائرہ گردش کرتی رہے تو قانون و انصاف کے دامن پر لگا داغ ملامت کسی دھوبی گھاٹ پہ مٹایا نہیں جا سکتا۔

نواز شریف کا سارا معاملہ ایک کھلی کتاب ہے،  روزِ اول سے لے کر آج تک لاتعداد خامیوں، کمزوریوں اور کھلی ناانصافیوں میں لت پت اس مقدمے کو کسی، آڈیو کسی ویڈیو، کسی بیانِ حلفی، کسی اضافی گواہی کی ضرورت نہیں، صرف اس سلسلہ واقعات پر نظر ڈالیے جو 2014کے ڈی چوک کے شہرہ آفاق دھرنے سے شروع ہو کر اکتوبر 2016میں ایک اور لاک ڈاؤن تک پھیلا ہوا ہے اور نومبر 2016سے آج تک جس کی کڑیاں بکھری نظر آتی ہیں تو سب واضح ہو جاتا ہے۔

میں آج پٹاری سے کسی آڈیو یا ویڈیو کیسٹ کا سنپولیا یا شیش ناگ نہیں نکال رہا نہ کسی پہلے سے زیر گردش کیسٹ کی صداقت پر بحث کرنا مقصود ہے میں ایک ایسی شہادت ریکارڈ پر لانا چاہتا ہوں جسے جھٹلانا کسی سیاسی فنکار کے لئے ممکن نہیں ہوگا۔

یہ شہادت دراصل ایک خبر ہے جو وزارتِ عظمیٰ سے نواز شریف کی بیدخلی سے آٹھ ماہ قبل ایک بھارتی صحافی ایم،جے، اکبر کی زیر ادارت مرتب ہونے والے معروف ویب میگزین Sunday Guardian live ( سنڈے گارڈین لائیو) میں شائع ہوئی۔

 یہ اسٹوری بھارت کے ایک کہنہ مشق صحافی، ماہر تعلیم اور محقق، مادھو نالپٹ Madhav Nalpat کی ہے، ان کی یہ سنسنی خیز اسٹوری 6نومبر 2016کو صبح دو بج کر ایک منٹ پر اپ لوڈ ہوئی، تب جنرل راحیل شریف اپنے منصب پر قائم تھے اگر چہ ان کی ریٹائرمنٹ میں صرف تین ہفتے باقی تھے لیکن ان کے گوشۂ دل میں توسیع کا چراغ ابھی تک ٹمٹما رہا تھا،  وہ کسی معجزے کے منتظر تھے۔

ناکارہ فضول اور لایعنی(Frivolous)قرار دی جانے والی پٹیشنز سپریم کورٹ میں لگ گئی تھیں،  بینچ تشکیل پا گیا تھا اور باقاعدہ سماعت شروع ہونے کو تھی دُور دُور تک کسی JITکا نام و نشان بھی نہ تھا، نواز شریف بھاری پارلیمانی اکثریت کے ساتھ اپنے عہدے پر موجود تھے اور کاروبار حکومت عمدہ طریقے سے چل رہا تھا،  سنڈے گارڈین لائیو 6نومبر 2016کی اسٹوری کا عنوان تھا"GENERAL RAHEEL SHARIF PLANS JUDICIAL COUP AGAINST NAWAZ"۔’’جنرل راحیل شریف نے نواز شریف کیخلاف عدالتی بغاوت کا منصوبہ بنا لیا‘‘ تفصیل میں بتایا گیا کہ:

’’پاکستان کی صورت حال پر نظر رکھنے والے اہم ممالک پیش بینی کر رہے ہیں کہ راولپنڈی نے ایک منصوبے پر کام شروع کر دیا ہے، جس کا مقصد وزیراعظم نواز شریف کو 2017کے وسط تک اپنے منصب سے ہٹا دینا ہے،  اس دفعہ مشرف کے انداز میں فوجی بغاوت کا طریقہ اختیار کرنے کے بجائے یہ منصوبہ بنایا گیا ہے کہ نواز شریف کو منصب سے ہٹانے کے لیے سپریم کورٹ سے کام لیا جائے ( جو اس کے لیے کوئی مشکل کام نہیں)۔ منصوبے کے مطابق سپریم کورٹ نواز شریف کو مجرم قرار دیتے ہوئے اس پر کئی مقدمات کا آغاز کریگی، عدالت کی جانب سے دیے گئے فیصلے میں پانامہ پیپرز کے انکشافات کو بنیاد بنایا جائیگا۔‘‘ خبر میں مزید کہا گیا:

‘‘ذرائع کا دعویٰ ہے کہ عمران خان کی تازہ احتجاجی مہم کا اسکرپٹ اس امر کو یقینی بنانے کے لیے تیار کیا گیا ہے کہ سپریم کورٹ نواز شریف کی کرپشن کا نوٹس لے اور یوں زنجیر کی کڑیوں کی طرح ایک دوسرے سے جُڑے اس سلسلہ واقعات کا نتیجہ نواز شریف کے زوال کی شکل میں ظاہر ہو‘‘۔

سپریم کورٹ میں مقدمے کی کارروائی، جےآئی ٹی کے قیام اور اسکی رپورٹ اور جولائی 2017 میں سپریم کورٹ کے فیصلے سے آٹھ ماہ قبل چھپنے والے اس آرٹیکل میں سات امور کی نشاندہی کی گئی تھی۔

(1) راحیل شریف نے نواز شریف کو منصب سے ہٹانے کا منصوبہ تیار کیا ہے۔( ایسا ہی ہوا)۔(2) نواز شریف کو فوجی بغاوت کے بجائے سپریم کورٹ کے ذریعے نکالا جائیگا۔(ایسا ہی ہوا)۔(3) عمران خان کے تازہ احتجاج کے اسکرپٹ کا مقصد یہ ہے کہ سپریم کورٹ پر دباؤ ڈال کر اسے سماعت کے لیے مجبور کیا جائے۔( ایسا ہی ہوا)۔(4) نواز شریف کو کرپشن کے الزام میں ہٹایا جائے گا۔ ( ایسے ہی ہوا)۔(5) اس الزام کا رشتہ پانامہ لیکز سے جُڑا ہوگا۔( ایسے ہی ہوا)۔ (6) نواز شریف کو وسط2017 تک فارغ کر دیا جائے گا۔ (ایسے ہی ہوا۔ جولائی2017)۔(7) فراغت کے بعد نواز شریف پر مختلف النوع مقدمات کا آغاز ہو جائے گا۔ (ایسے ہی ہوا)

جانے دیجئے آڈیو اور ویڈیو لیکس کو شوکت عزیز صدیقی، جج ارشد اور رانا شمیم کی گواہیوں اور بیانات حلفی پر مٹّی ڈالیے، صرف زنجیر کی کڑیوں کی طرح ایک دوسرے میں پیوست سلسلہ ہائے واقعات پر ایک نظر ڈالیے، ہماری بے مایہ تاریخ کے اس ناٹک کے تحریر کار، ہدایت کار، پیش کار اور کردار سب اپنے چہروں کے تمام تر خدوخال کے ساتھ نمایاں نظر آئیں گے۔

جیو نیوز، جنگ گروپ یا اس کی ادارتی پالیسی کا اس تحریر کے مندرجات سے متفق ہونا ضروری نہیں ہے۔