08 دسمبر ، 2021 
وزیراعظم کا گیس ذخائر کی کمی کا نوٹس، گیس چوری اور ضیاع کی تفصیلات طلب
08 دسمبر ، 2021
وفاقی وزیر برائے توانائی حماد اظہر نے گیس کے ذخائر سے متعلق خطرے کی گھنٹی بجا دی۔
کابینہ کو بریفنگ کے دوران وزیر توانائی نے خطرے کی گھنٹی بجاتے ہوئے کہا کہ گیس کے ذخائر ختم ہونے کو ہیں، سالانہ 9 فیصد کی شرح سے ذخائر کم ہو رہے، نئے ذخائر نہ ملنے کے باعث آئندہ سالوں میں گیس مکمل ختم ہو جائے گی جبکہ مستقبل میں درآمدی گیس پر ہی انحصار کرنا ہوگا۔
وزیر توانائی نے بتایا کہ درآمدی گیس کیلئے نئے ایل این جی ٹرمینلز کی تعمیر جاری ہے، روس کے تعاون سے گیس پائپ لائن کی تعمیر کی کوششیں بھی جاری ہیں۔
دوسری جانب وزیراعظم عمران خان نے گیس کی پیداوار میں کمی کا نوٹس لیتے ہوئے متعلقہ وزارت سے گیس چوری اور ضیاع کی تفصیلات طلب کر لیں۔
وزیراعظم نے گیس ذخائر میں تیزی سے کمی پر تشویش کا اظہار کرتے ہوئے ہدایت کی کہ گیس ذخائر میں بہتری کیلئے قلیل، وسط اور طویل مدتی منصوبے شروع کیے جائیں۔
