پاکستان
21 دسمبر ، 2021

کے پی بلدیاتی الیکشن: جے یو آئی چیئرمین کی 17 اور میئر کی 3 نشستوں کے ساتھ سب سے آگے

خیبر پختونخوا (کے پی) بلدیاتی انتخابات کے پہلے مرحلے میں جمعیت علمائے اسلام (جے یو آئی) تحصیل چیئرمین کی 17 اور سٹی میئر کی 3 نشستوں کے ساتھ سب سے آگے رہی،  اے این پی نے میئر کی ایک اور تحصیل کونسل کی 5 نشستیں جیتیں، تحریک انصاف نے تحصیل چیئرمین کی 13، آزاد امیدوار 9، ن لیگ 3، جماعت اسلامی 2، پی پی اور تحریک اصلاحات کو ایک ایک نشست ملی جبکہ 9 تحصیلوں کے نتائج آنا باقی ہیں۔

کے پی بلدیاتی الیکشن: جے یو آئی چیئرمین کی 17 اور میئر کی 3 نشستوں کے ساتھ سب سے آگے

خیبر پختونخوا میں بلدیاتی انتخابات کے پہلے مرحلے میں 19 دسمبر کو صوبے کے 17 اضلاع کی 61 تحصیل کونسلز (چیئرمین) کی نشستوں میں سے 60 اور 5 سٹی کونسلز (میئرز) کی نشستوں میں سے 4 پر پولنگ ہوئی جن کے نتائج تقریباً مکمل ہوچکے ہیں۔

چیئرمین تحصیل کونسل کی جس ایک نشست پر پولنگ نہیں ہوئی وہ بنوں کی تحصیل بکا خیل ہے جہاں پولنگ اسٹیشن میں ہنگامہ آرائی کے بعد پولنگ ملتوی کردی گئی تھی۔

اس کے علاوہ سٹی کونسل کی بھی ایک نشست ڈی آئی خان پر پولنگ نہیں ہوئی۔ اس نشست پر اے این پی کے امیدوار کو قتل کیے جانے پر پولنگ ملتوی ہوئی۔ یعنی مجموعی طور پر تحصیل کونسلز کی 60 اور سٹی کونسلز کی 4 نشستوں پر انتخابات ہوئے۔

17 اضلاع کی 60 تحصیل کونسلز کے نتائج

اب تک 60 تحصیل کونسلز میں چیئرمین کی نشست کیلئے ہونے والے الیکشن میں سے 51 کے نتائج سامنے آچکے ہیں جن کی تفصیل درج ذیل ہے۔

کے پی بلدیاتی الیکشن: جے یو آئی چیئرمین کی 17 اور میئر کی 3 نشستوں کے ساتھ سب سے آگے


جمعیت علمائے اسلام (جے یو آئی)                                 17 نشستیں

پاکستان تحریک انصاف (پی ٹی آئی)                               13 نشستیں

آزاد امیدوار                                                                                                                       9 نشستیں

عوامی نیشنل پارٹی (اے این پی)                                          5 نشستیں

پاکستان مسلم لیگ (ن)                                                                 3 نشستیں

جماعت اسلامی                                                                                        2 نشستیں

پیپلز پارٹی                                                                                                            ایک نشست

تحریک اصلاحات پاکستان                                                   ایک نشست


ٹوٹل                                                                                                                              51 نشستیں



اضلاع کے لحاظ سے تحصیل کونسلز کے نتائج

1 پشاور

ضلع پشاور کی تمام 6 تحصیل کونسلز کے نتائج موصول ہوچکے ہیں جن کے مطابق 4 تحصیل کونسلز پر جمعیت علمائے اسلام (جے یو آئی) اور ایک پر پاکستان تحریک انصاف (پی ٹی آئی) جب کہ ایک تحصیل پر عوامی نیشنل پارٹی (اے این پی) کامیاب ہوئی۔

2 چار سدہ

ضلع چار سدہ کی تمام 3 تحصیلوں کے نتائج موصول ہوچکے ہیں جن کے مطابق 2 تحصیلوں پر جے یو آئی اور ایک پر آزاد امیدوار کامیاب ہوا ہے۔

3 نوشہرہ

نوشہرہ کی تینوں تحصیل کونسلز کے نتائج موصول ہوگئے ہیں جن کے مطابق عوامی نیشنل پارٹی نے ایک اور پاکستان تحریک انصاف نے دو نشستوں پر کامیابی حاصل کی۔

4 خیبر

ضلع خیبرکی 3 تحصیلوں میں سے 2 کا مکمل نتیجہ موصول ہوچکا ہے جس کے مطابق ایک تحصیل میں پی آئی ٹی اور ایک میں جے یو آئی کامیاب ہوئی ہے۔

5 مہمند

ضلع مہمند کی تینوں تحصیلوں کے مکمل نتائج موصول ہوچکے ہیں جس کے مطابق 2 تحصیلوں میں جے یو آئی اور ایک پر پی ٹی آئی کامیاب ہوئی ہے۔

6 مردان

ضلع مردان کی تمام 4 تحصیل کونسلز کے مکمل نتائج موصول ہوچکے ہیں۔ مردان کی تین تحصیل کونسلز میں جے یو آئی کے امیدوار کامیاب ہوئے ہیں جبکہ ایک تحصیل میں اے این پی کا امیدوار کامیاب ہوا۔

7 صوابی

ضلع صوابی کی تمام 4 تحصیلوں کے مکمل نتائج موصول ہوچکے ہیں جن میں سے ایک تحصیل میں ن لیگ، ایک میں پی ٹی آئی، ایک میں جے یو آئی اور ایک میں اے این پی کامیاب ہوئی۔

8 کوہاٹ

ضلع کوہاٹ کی 3 تحصیل کونسل میں سے 2 کے مکمل نتائج موصول ہوچکے ہیں جن میں سے کوہاٹ کی ایک تحصیل میں پی ٹی آئی، ایک میں آزادامیدوار کامیاب ہوئے ہیں۔

9 کرک

ضلع کرک کی 3 تحصیلوں میں سے ایک کا بھی مکمل نتیجہ موصول نہیں ہوسکا ہے۔

10 ہنگو

ضلع ہنگو کی 2 تحصیل کونسلز کے مکمل نتائج موصول ہوچکے ہیں جن میں سے ایک تحصیل میں جے یو آئی اور دوسری میں آزاد امیدوار کامیاب ہوا ہے۔

11 بنوں

بنوں کی تمام 5 تحصیلوں کے مکمل نتائج موصول ہوچکے ہیں جن میں سے تین تحصیلوں میں پی ٹی آئی، ایک میں جے یو آئی اور ایک میں آزاد امیدوار کامیاب ہوا۔

بنوں کی ایک تحصیل بکا خیل میں بلدیاتی انتخابات ملتوی ہوئے۔

12 لکی مروت

ضلع لکی مروت کی 4 تحصیلوں میں سے 3 کے مکمل نتائج موصول ہوچکے ہیں جن میں سے ایک تحصیل میں جماعت اسلامی اور 2 میں آزاد امیدوار کامیاب ہوئے۔

13 ڈی آئی خان

ڈی آئی خان کی تمام 5 تحصیل کونسلز کے مکمل نتائج موصول ہوچکے ہیں جن میں سے 2 تحصیلوں پر آزاد امیدوار، ایک میں جماعت اسلامی، ایک میں پیپلزپارٹی اور ایک میں پی ٹی آئی کامیاب ہوئی۔

14 ٹانک

ضلع ٹانک کی دونوں تحصیلوں کے مکمل نتائج موصول ہوچکے ہیں اور دونوں تحصیلوں میں جے یو آئی کے امیدوار کامیاب قرار پائے۔

15 ہری پور

ضلع ہری پور کی تمام 3 تحصیلوں کے مکمل نتائج موصول ہوچکے ہیں جن میں سے 2 میں ن لیگ اور ایک میں آزاد امیدوار کامیاب ہوا۔

16 بونیر

ضلع بونیر کی 6 تحصیلوں میں سے 5 کے مکمل نتائج موصول ہوچکے ہیں۔ بونیر کی 4 تحصیلوں میں پی ٹی آئی اور ایک میں اے این پی کامیاب ہوئی۔

17 باجوڑ

ضلع باجوڑ کی 2 تحصیلوں میں سے ایک کے بھی مکمل نتائج موصول نہیں ہوسکے ہیں۔


9 تحصیلوں کے کچھ پولنگ اسٹیشنز پر دوبارہ پولنگ ہوگی

  • ضلع لکی مروت کی ایک تحصیل لکی مروت میں 2  پولنگ اسٹیشنز  پر دوبارہ پولنگ ہوگی۔
  • ضلع باجوڑ کی تحصیل خار میں 2 اور  تحصیل  نواگئی کے 4 پولنگ اسٹیشنز  پر دوبارہ پولنگ ہوگی۔
  • ضلع خیبر کی تحصیل لنڈی کوتل کے 20 پولنگ اسٹیشنز  پر بھی دوبارہ پولنگ ہوگی۔
  • ضلع  بونیر کی تحصیل خدوخیل میں 3 پولنگ اسٹیشنز پر دوبارہ پولنگ ہوگی۔
  • اس کے علاوہ ضلع کوہاٹ کی تحصیل درہ آدم خیل میں جلاؤ گھیراؤ کی وجہ سے نتائج روک لیے گئے ہیں اور یہ فیصلہ تاحال نہیں ہوسکا ہے کہ درہ آدم خیل کی پوری تحصیل میں دوبارہ پولنگ ہوگی یا پھر مخصوص پولنگ اسٹیشنز  پر  دوبارہ پولنگ کی جائے گی۔
  • ضلع کرک کی 3 تحصیلوں میں بھی کچھ پولنگ اسٹیشنز  پر دوبارہ پولنگ ہو گی۔

نوٹ: یہ واضح نہیں کہ مذکورہ 9 تحصیل کونسلز کے بعض پولنگ اسٹیشنز میں پولنگ کب ہوگی۔ 


سٹی کونسلز کے نتائج

بلدیاتی انتخابات کے پہلے مرحلے میں چاروں سٹی کونسلز کے مکمل نتائج سامنے آگئے ہیں جن میں سے 3 میں جے یو آئی اور ایک میں اے این پی کامیاب ہوئی ہے— فوٹو: فائل
بلدیاتی انتخابات کے پہلے مرحلے میں چاروں سٹی کونسلز کے مکمل نتائج سامنے آگئے ہیں جن میں سے 3 میں جے یو آئی اور ایک میں اے این پی کامیاب ہوئی ہے— فوٹو: فائل

بلدیاتی انتخابات کے پہلے مرحلے میں چاروں سٹی کونسلز کے مکمل نتائج سامنے آگئے ہیں جن میں سے 3 میں جے یو آئی اور ایک میں اے این پی کامیاب ہوئی ہے۔

1 پشاور

پشاور شہر کے میئر کی نشست جے یو آئی کے حصے میں آئی۔

2 مردان

مردان کے میئر کی نشست عوامی نیشنل پارٹی کے امیدوار نے جیتی ہے۔

3 کوہاٹ

کوہاٹ سٹی کے میئر کی نشست پر جے یو آئی کا امیدوار کامیاب ہوا۔

4 بنوں

بنوں سٹی کونسل کے میئر کی نشست پر جے یو آئی کامیاب ہوئی۔

نوٹ: سٹی کونسل کی پانچویں نشست ڈی آئی خان میں تھی جہاں الیکشن نہیں ہوئے۔


مزید خبریں :

Notification Management


پاکستان
دنیا
کاروبار
کھیل
انٹرٹینمنٹ
صحت و سائنس
دلچسپ و عجیب

ڈیسک ٹاپ نوٹیفکیشن کے لیے سبسکرائب کریں
Powered by IMM