26 دسمبر ، 2021 
سائرہ کی سابق شوہر شہروز کیساتھ فلم، رومانوی گانا تاخیر کا شکار
26 دسمبر ، 2021
معروف اداکارہ سائرہ یوسف اور ان کے سابق شوہر اداکار شہروز سبزواری جلد ہی ایک فلم میں ساتھ نظر آئیں گے۔
سائرہ اور ان کے سابق شوہر شہروز کے ایک ساتھ فلم میں کام کرنے کی خبریں کئی عرصے سے سوشل میڈیا پر زیرِ گردش تھیں اور حال ہی میں سائرہ یوسف نے نجی ٹی وی کے پروگرام میں اس پر تفصیلی بات بھی کی۔
اداکارہ نے بتایا کہ یہ فلم رومانوی اور کامیڈی کا مکسچر ہے جس کی تقریباً عکسبندی مکمل ہو چکی ہے، البتہ ایک رومانوی گانا ہے جس کی شوٹنگ تاحال نہیں ہوئی۔
میزبان کی جانب سے گانے کی شوٹنگ میں تاخیر کی وجہ پوچھی گئی تو اداکارہ نے لاعلمی کا اظہار کیا اور کہا کہ شاید تاریخ کی وجہ سے اب تک شوٹ نہیں ہوا یا ہوسکتا ہے بجٹ کی وجہ سے اس کی شوٹنگ رہ گئی ہو۔
سائرہ یوسف نے یہ بھی بتایا کہ فلم میکرز اس فلم کو آئندہ سال کے آغاز پر ریلیز کرنا چاہتے تھے لیکن اب نہیں پتہ کہ فلم کب ریلیز کی جائے گی۔
واضح رہے کہ اداکارہ سائرہ یوسف اور شہروز سبزواری نے طلاق کی تصدیق 29 فروری 2020 کو کی تھی، بعدازاں شہروز نے ماڈل و اداکارہ صدف کنول سے شادی کر لی تھی۔
مزید خبریں :
سدھو نے کپل شرما شو چھوڑنے کی اصل وجہ 5 سال بعد بتادی
15 نومبر ، 2024
