14 جنوری ، 2022 
دبئی سے کراچی آنیوالے تاجر کی شادی کا مسروقہ سامان برآمد
14 جنوری ، 2022
دبئی سے کراچی پہنچنے والے تاجر کی فیملی کا ائیرپورٹ سے چوری کیا گیا شادی کا سامان پولیس نے برآمد کرلیا۔
ائیرپورٹ تھانے کے حکام کے مطابق 14 جنوری کو محمد ظفر نامی مقامی تاجر نے ائیرپورٹ تھانے میں اطلاع دی کہ وہ اپنے اہلخانہ کے ساتھ شادی کی ایک تقریب میں شرکت کیلئے 12 جنوری کو دبئی سے امارات ائیر لائن کی پرواز ای کے 602 کے ذریعے کراچی پہنچے تھے۔
تاجر کے مطابق ائیر پورٹ سے وہ فیملی کے ہمراہ اپنے گھر چلے گئے، گھر پہنچ کر چیک کیا تو معلوم ہوا کہ ان کے پاس شادی کے قیمتی سامان کے گتے کا ایک کاٹن تھا جو غائب تھا۔
پولیس حکام نے کہا ہے کہ اطلاع پر وہ فوری طور پر ائیرپورٹ پر پہنچے اور انکوائری اور تدبیر سے مذکورہ بالا سامان برآمد کرلیا۔
حکام نے بتایا کہ شکایت کنندہ کو اپنا لگ بھگ ایک لاکھ روپے مالیت کا سامان ملنے کی قطعی امید نہیں تھی لیکن اگلے دن جب وہ اس سلسلے میں معلوم کرنے کیلئے تھانے پہنچے تو انہیں مکمل سامان دے دیا گیا۔
