11 فروری ، 2022 
پی ڈی ایم میں اختلافات اپنی جگہ لیکن عمران خان کے جانے پر سب متفق ہیں، بلاول
11 فروری ، 2022
چیئرمین پاکستان پیپلز پارٹی بلاول بھٹوزرداری نے مظفر گڑھ ضمنی الیکشن میں زیادہ ووٹ لینے پر پارٹی ورکرز کو شاباش دی اور کہا ہے کہ ہمارا مطالبہ آج بھی یہی ہےکہ پارلیمانی کمیشن پر عمل درآمد کرکے صوبہ بنایا جائے۔
انہوں نے کہا کہ پیپلز پارٹی نے پاکستان ڈیموکریٹک موومنٹ (پی ڈی ایم) کی بنیاد رکھی،اختلافات اپنی جگہ لیکن عمران خان کے جانے پر سب متفق ہیں۔
بلاول بھٹو زرداری سابق وزیرخارجہ حنا ربانی کھر کے گھر اُن کے والد کے انتقال پر اظہار تعزیت کے لیے پہنچے۔
اس موقع پر میڈیا سے بات کرتے ہوئے بلاول بھٹو زرداری کا کہنا تھا کہ بھی میرا یہی نظریہ تھا، ہمارا مطالبہ آج بھی یہی ہےکہ خان صاحب کو جمہوری طریقے سے ہٹانا ہے، پی ڈی ایم کی بنیاد رکھتے ہوئے بھی میرا یہی نظریہ تھا۔
بلاول بھٹو زرداری ہیلی کاپٹر کے ذریعے سنانواں کے علاقے کھر غربی پہنچے۔ بلاول بھٹو زرداری نےحنا ربانی کھر اور ان کے بھائی رضا ربانی کھر سے ان کے والد کے انتقال پر اظہار تعزیت کیا۔
حنا ربانی کھر کے والد غلام محمد نور ربانی کھر کچھ روز قبل انتقال کرگئے تھے۔
