پاکستان کی شوبز شخصیات تحریک عدم اعتماد مسترد ہونے پر خوش

وزیر اعظم عمران خان کے خلاف اپوزیشن کی جانب سے تحریکِ عدم اعتماد مسترد ہونے پر اداکاروں کا بھی ردعمل سامنے آیا ہے۔

فیصل قریشی نے انسٹاگرام پر اسٹوری پوسٹ کی اور تحریک عدم اعتماد کے ناکام ہونے پر خوشی کا اظہار کیا۔

اداکار نے اسٹوری میں اپوزیشن پر مضحکہ خیز انداز میں لکھا کہ 'ہُن آرام اے (اب آرام ہے)'۔

عمران خان کی حمایت کرنے والی اداکارہ اریج فاطمہ نے بھی اپنی خوشی کا اظہار انسٹاگرام اسٹوری کے ذریعے کیا، انہوں نے اسٹوری پر دل کھول کر قہقہے لگائے۔

اریج فاطمہ نے اپنی انسٹا اسٹوری پر بڑا سا اسٹکر بھی لگایا جو کہ ہنس رہا تھا۔

گلوکار و اداکار ہارون شاہد نے ٹوئٹر پر تحریک عدم اعتماد کی ناکامی کے بعد متعدد ٹوئٹس کیں۔

انہوں نے لکھا کہ سارا دن گرمی میں فیلڈنگ کرواکے جب بیٹنگ آئی تو اگلے ڈیکلیئر کراکے چکے گئے۔

ہارون شاہد نے طنزیہ لکھا کہ اوپر سے گیند، ٹیپ اور گراؤنڈ کے پیسے بھی دینا پڑے۔

ایک اور ٹوئٹ میں اداکار نے کہا کہ عمران خان نے پارلیمنٹ سے گیم لے کر اپنی قوم کو عزت دی۔

اس کے علاوہ اداکارہ صبا قمر نے بھی عمران خان کے حق میں ٹوئٹ کی اور ان کے لیے خوشی کا اظہار کیا۔

فلم اسٹار شان شاہد نے عمران خان کی تصویر شیئر کرتے ہوئے لکھا کہ آپ کے مخالفین سمجھتے ہیں کہ آپ صرف اچھے کرکٹر ہیں لیکن دراصل آپ آج کے بہترین سیاسی ذہنیت کے مالک ہیں۔

اداکارہ ثمینہ پیرزادہ نے بھی عمران خان کے خلاف تحریک عدم اعتماد ناکام ہونے پر خوشی کا اظہار کیا۔