ماہِ صیام میں عمرے کی سعادت حاصل کرنے والے اداکار و کرکٹرز

عمرے کی سعادت حاصل کرنا ہر مسلمان کی خواہش ہوتی ہے لیکن اگر یہ خواہش ماہ رمضان میں پوری ہوجائے تو لوگ خود کو کسی خوش قسمت ترین انسان سے کم نہیں سمجھتے۔

حال ہی میں بھارت اور پاکستان سے تعلق رکھنے والے اداکار اور قومی کرکٹرز نے عمرے کی سعادت حاصل کی جس کی تصاویر اور ویڈیوز سوشل میڈیا اکاؤنٹس پر پوسٹ کی گئیں۔

یشما گل:

پاکستانی اداکارہ یشما گل گزشتہ روز ہی اپنی فیملی کے ہمراہ عمرے کی ادائیگی کے لیے مکہ مکرمہ روانہ ہوئی ہیں۔

اداکارہ نے انسٹاگرام اکاؤنٹ پر ویڈیو اور تصاویر شیئر کیں۔

زید علی:

پاکستانی نژاد کینیڈین یوٹیوبر زید علی بھی اپنی اہلیہ اور بیٹے ازیان کے ہمراہ رمضان المبارک کے آغاز میں مکہ مکرمہ گئے اور عمرے کی سعادت حاصل کی۔

زید نے بتایا کہ اس رمضان اللہ نے انہیں اپنے گھر بلایا جس کے لیے وہ ربِ کائنات کے شکر گزار ہیں۔

شاداب خان:

قومی کرکٹ ٹیم کے آل راؤنڈر شاداب خان نے 14 اپریل کو ٹوئٹر پوسٹ کے ذریعے اطلاع دی کہ انہوں نے عمرہ ادا کیا ہے۔

اپنی پوسٹ میں کرکٹر نے بتایا کہ انہوں نے ملک کے حالات بہتر ہونے کی دعا کی، ساتھ ہی انسانیت اور امن کے لیے بھی دعا کی۔

گوہر خان:

بھارتی اداکارہ اور بگ باس باس سیزن 7 کی فاتح گوہر خان اپنے خاوند زید دربار کے ہمراہ عمرے کی ادائیگی کے لیے ان دنوں مسجد الحرام میں موجود ہیں۔

انہوں نے کہا کہ ’اس سے زیادہ زندگی میں کسی چیز کی خواہش نہیں تھی، الحمدللہ میرا شوہر کے ساتھ عمرہ کرنے کا خواب پورا ہوا۔‘

اداکارہ نے اسے زندگی کی سب سے بڑی خوشی بھی قرار دیا۔

فاطمہ ثنا:

پاکستانی ویمن کرکٹ ٹیم کی فاسٹ بولر فاطمہ ثنا نے بھی اس رمضان اپنی زندگی کا پہلا عمرہ کیا جس کی تصویر انہوں نے انسٹاگرام پر پوسٹ کی۔

محمد وسیم:

پاکستان کرکٹ ٹیم کے چیف سلیکٹر محمد وسیم بھی ان خوش قسمت لوگوں میں سے ہیں جنہیں رمضان المبارک میں عمرے کی ادائیگی کا موقع ملا۔