01 جون ، 2022 
کراچی: جیل چورنگی پر سپر اسٹور میں آتشزدگی، عملے کی غفلت سامنے آ گئی
01 جون ، 2022
کراچی: جیل چورنگی کے قریب رہائشی عمارت میں واقع سپر اسٹور کے ویئر ہاؤس میں لگنے والی آگ کی شدت بڑھ گئی۔
ریسکیو حکام کے مطابق جیل چورنگی پر واقع 15 منزلہ رہائشی عمارت کے گراؤنڈ اور فرسٹ فلور پر سپر اسٹور قائم ہے جبکہ اسٹور کا ویئر ہاؤس عمارت کے بیسمنٹ میں ہے۔
ذرائع کے مطابق آگ عمارت کے بیسمنٹ میں کپڑوں میں لگی جو دیکھتے ہی دیکھتے پھیل گئی تاہم آگ لگنے کی وجوہات کا تاحال علم نہیں ہو سکا ہے۔
فائربریگیڈ حکام کا کہنا ہے کہ دو فائر ٹینڈر کے ذریعے سپر اسٹورکے بیسمنٹ میں لگی آگ کو بجھانے کی کوشش کر رہے ہیں۔
ریسکیو حکام کا کہنا ہے کہ رہائشی عمارت اور سپر اسٹور میں موجود تمام افراد کو بحفاظت باہر نکال لیا گیا ہے، آگ کے دھویں کے باعث 2 افراد کے بے ہوش ہونے کی اطلاعات ہیں۔
دوسری جانب پولیس، رینجرز اور قانون نافذ کرنے والے دیگر اداروں نے جائے وقوعہ پر پہنچ کر عوام کو سپر اسٹور کی طرف جانے سے روک دیا ہے۔
عینی شاہدین کا کہنا ہے کہ جیل چورنگی فلائی اوور کے قریب سپر اسٹور میں آتشزدگی پھیلنے میں عملے کی غفلت شامل ہے، سپراسٹورمیں لگی آگ بجھانےکی اپنی مدد آپ کے تحت کوشش نہیں کی گئی، سپر اسٹور کا عملہ آگ بجھانے کی کوشش کرنے کے بجائے باہر آکر کھڑا ہو گیا۔
فائر بریگیڈ حکام کا کہنا ہے کہ آگ بجھانے کے آلات کی مدد سے آتشزدگی پر فوری قابو پایا جا سکتا تھا۔
