09 جون ، 2022 
وزیراعظم کیخلاف منی لانڈرنگ کیس کے اہم ملزم مقصود احمد دبئی میں انتقال کر گئے
09 جون ، 2022
وزیراعظم شہباز شریف کے خلاف کروڑوں روپے کی منی لانڈرنگ کیس کے اہم ملزم مقصود احمد دبئی میں انتقال کر گئے۔
پاکستان تحریک انصاف کے رہنما فرخ حبیب نے بھی مقصود احمد کے انتقال کی تصدیق کرتے ہوئے بتایا کہ مقصود چپڑاسی دبئی میں انتقال کر گئے۔
مقصود احمد کے خاندانی ذرائع کا بتانا ہے کہ مقصود ان دنوں بیرون ملک تھے اور انہیں کافی روز سے دل میں تکلیف کی شکایت تھی۔
دوسری جانب تحریک انصاف کے رہنما شہباز گل نے سوشل میڈیا پر جاری بیان میں لکھا کہ کیا مقصود چپڑاسی کو قتل کر دیا گیا ہے؟
دبئی پولیس کی جانب سے مقصود احمد کے انتقال کی تصدیق کرتے ہوئے ان کا ڈیتھ سرٹیفکیٹ بھی جاری کر دیا ہے جس میں بتایا گیا ہے کہ مقصود احمد کا انتقال دل کی تکلیف باعث 7 جون کو ہوا۔
یاد رہے کہ مقصود احمد کا نام وزیراعظم شہباز شریف اور وزیراعلیٰ پنجاب حمزہ شہباز کے خلاف اربوں روپے کی منی لانڈرنگ کیس میں استعمال ہوتا رہا ہے اور پاکستان تحریک انصاف کے دور میں مشیر برائے احتساب شہزاد اکبر بارہا دعویٰ کر چکے ہیں کہ شہباز شریف اور حمزہ شہباز نے ذاتی ملازم مقصود چپڑاسی کے اکاؤنٹ میں کروڑوں روپے منتقل کیے۔
