23 جون ، 2022
دنیا بھر میں اہم شخصیات کی جانب سے اپنے بچپن کی تصاویر شیئرکی جاتی ہیں جس میں زیادہ تر شوبز اور اسپورٹس شخصیات اپنی تصاویر شیئر کرتی ہیں لیکن اس بار یہ تصویر حکومت پاکستان میں اہم منصب پر فائز رہنے والی شخصیت نے شیئر کی۔
زیر نظر تصویر پی ٹی آئی دور حکومت میں مشیر برائے قومی سلامتی امور معید یوسف کی ہے جنہوں نے اپنی 25 سال پرانی تصویر اپنے بیٹے کی تصویر کے ساتھ شیئر کی۔
معید یوسف نے اپنی ٹوئٹ میں لکھا کہ ’ آج تک کا میری زندگی کا سب سے فخریہ لمحہ جب میں نے بطور گالفر پہلی بار پاکستان کی نمائندگی کی اور پاکستان کا آفیشل کلر زیب تن کیا‘۔
سابق مشیر نے لکھا کہ ’یہ 25 سال پہلے کی بات ہے اور اللہ کا شکر ہے کہ اس ہفتے بیٹے نے مجھے فخر کرنے کا موقع دیا ‘۔
انہوں نے مزید کہا کہ میرے بیٹے نے ویسٹ ایشین جونیئر چیمپئن شپ کے لیے انڈر 14 شطرنج ٹیم میں پاکستان کی نمائندگی کی ہے۔