06 جولائی ، 2022 
الیکشن کمیشن بے ضمیر ہوگیا، لوٹوں کو جتوانے کی کوشش کر رہا ہے، عمران خان کا الزام
06 جولائی ، 2022
چیئرمین پاکستان تحریک انصاف عمران خان کا کہنا ہےکہ ہمیں کہا جا رہا ہےکہ ان چوروں کو خود پر مسلط کرنے سے انکار کرو گے تو سزا ملےگی، جو ان چوروں کے ساتھ کھڑا ہے اس کا بھی احتساب ہوگا، قوم ان کو کبھی معاف نہیں کرےگی ۔
ساہیوال میں جلسے سے خطاب کرتے ہوئے عمران خان کا کہنا تھا کہ الیکشن کمیشن ان کے ساتھ مل کر چوروں اور لوٹوں کو جتانےکی کوشش کر رہا ہے، الیکشن کمیشن بے ضمیر ہو گیا، ان کے ساتھ مل کر دھاندلی کر رہا ہے۔
عمران خان کا کہنا تھا کہ یہ سمجھتے ہیں کہ امپائر کو ساتھ ملا کر الیکشن جیت جائیں گے، نوجوانوں تیار ہوجاؤ، آپ نے ان کو دھاندلی نہیں کرنے دینی، ہر پولنگ اسٹیشن پر دس دس نوجوان ہونے چاہئیں، نوجوانو، آپ نے ان کو دھاندلی نہیں کرنے دینی، شریف جو مرضی کرلیں17 جولائی کو ضمنی الیکشن میں تمام نشستیں جیتیں گے۔
سربراہ تحریک انصاف کا کہنا تھا کہ چوروں کے ساتھ کھڑے ہونے والوں کو نہ قوم اور نہ تاریخ معاف کرےگی، پر امن احتجاج کا راستہ روکیں گے تو آپ کو ملک انتشار کی طرف دھکیلیں گے، آزادی اظہار رائےکا راستہ نہ بند کرو، لوگوں کو ایف آئی آر سے نہ ڈراؤ۔
عمران خان کا کہنا تھا کہ قوم لوٹوں کو بھی سمجھ گئی ہے اور ڈیزل کو بھی سمجھ گئی ہے، انہوں نے آنےکے ساتھ ہی مہنگائی آسمان پر پہنچادی، یہ ملک کی معیشت کو دو ماہ میں اوپر سے نیچے لے آئے، ہمارے دور میں انڈسٹری نے ترقی کی ،کسانوں کو سب سے زیادہ فائدہ ہوا، آج ہمارے کسانوں کا معاشی قتل کردیا گیا۔
