پیٹرولیم ڈیلرز کا 18جولائی کو ملک گیر ہڑتال کا اعلان
13 جولائی ، 2022
پاکستان پیٹرولیم ڈیلرز ایسوسی ایشن کی جانب سے مطالبات منظور نہ ہونےکی صورت میں 18 جولائی کو ملک گیر ہڑتال کا اعلان کردیا گیا۔
پیٹرولیم ڈیلرزایسوسی ایشن کا کہنا ہے کہ مزدور کی کم سے کم اجرت 25 ہزارہوگئی ہے لیکن ڈیلرز کا کمیشن نہیں بڑھایا جارہا، حکومت وعدے کے مطابق ڈیلرز کا کمیشن 6 فیصد کرے۔
پاکستان پیٹرولیم ڈیلرز ایسوسی ایشن نے 18 جولائی کو ملک گیر ہڑتال کا اعلان کر دیا ہے اور اس حوالے سے لاہور کے پیٹرول پمپس پر ہڑتال اور مطالبات کے حوالے سے بینرز آویزاں کردیےگئے ہیں جن پر ڈیلرز مارجن بڑھانےکا مطالبہ کیا گیا ہے۔
پاکستان پیٹرولیم ڈیلرز ایسوسی ایشن لاہور کے جنرل سیکرٹری چوہدری نعمان مجید کا کہنا ہے کہ کم از کم اجرت 25 ہزار روپے ہو چکی ہے جب کہ بجلی کی قیمت بھی دگنا ہو گئی ہے اور لوڈشیڈنگ میں اضافے سے جنریٹرز کے اخراجات بھی بڑھگئے ہیں۔
انہوں نےکہا کہ کاروباری اخراجات دگنا سے تگنا ہوگئے مگر ہمارا مارجن نہیں بڑھایا جا رہا ہے، حکومت وعدے کے مطابق ڈیلرز کا مارجن 6 فیصد کرے کیوں کہ موجودہ حالات میں ہم کاروبار نہیں کر سکتے اس لیے ہڑتال پر مجبور ہیں۔
