24 جولائی ، 2022 
حب ڈیم سےکراچی کو پانی سپلائی کرنے والی نہر میں شگاف پڑگیا
24 جولائی ، 2022
حب ڈیم سےکراچی کو پانی سپلائی کرنے والی نہر میں شگاف پڑگیا اور متاثرہ حصے سے بہنے والا پانی قریبی گوٹھوں کی جانب بہنے لگا ہے۔
واٹر بورڈ ذرائع کے مطابق ناردرن بائی پاس دعا ہوٹل کے قریب حب نہرکا حصہ ٹوٹا ہے، اس نہر سےکراچی کو پانی فراہم کیا جاتا ہے۔
متاثرہ حصے سے بہنے والا پانی قریبی گوٹھوں کی جانب جا رہا ہے، شدید بارش کی وجہ سے یہ حصہ ٹوٹا ہے، پانی عیسٰی اور خمیسو گوٹھ میں داخل ہوسکتا ہے، ایک گھنٹہ گزرنے کے باوجود انتظامیہ نہیں پہنچ سکی، ذرائع کے مطابق کراچی میں پانی کی سپلائی بھی متاثر ہو سکتی ہے۔
دوسری جانب پولیس کا کہنا ہےکہ پانی منگھوپیرکے غیر آباد علاقے میں جا رہا ہے، شگاف کو پرکرنے کے لیے مشینری لائی جارہی ہے، حب کینال کی مرمت تک پانی کی فراہمی بند کردی گئی ہے۔
پولیس کے مطابق تاحال منگھوپیر کی کسی رہائشی آبادی کے متاثر ہونےکی اطلاع نہیں ہے۔
ادھر ڈپٹی کمشنر ویسٹ کی ٹیم جائے وقوع پر پہنچ گئی ہے اور نہر کی مرمت کا کام شروع کردیا گیا ہے۔
ایس ایس پی ویسٹ فرخ رضا کا کہنا ہےکہ پولیس کی نفری بھی متاثرہ حصے پر موجود ہے، ڈپٹی کمشنر ویسٹ سے مستقل رابطے میں ہیں،جلد متاثرہ حصے کی مرمت مکمل کرلی جائے گی۔
