کھیل

پہلا ون ڈے: پاکستان نے سنسنی خیز مقابلےکے بعد نیدرلینڈز کو 16 رنز سے شکست دے دی

16 اگست ، 2022

دونوں ٹیموں کے درمیان 3 ایک روزہ میچز کھیلے جائیں گے،پہلا آج جب کہ دوسرا 18 اگست اور تیسرا 21 اگست کو کھیلا جائے گا__فوٹو: پی سی بی

پاکستان اور نیدرلینڈز کے درمیان کھیلے گئے پہلے ون ڈے میں پاکستان نے سنسنی خیز مقابلے کے بعد نیدرلینڈز کو 16 رنز سے شکست دے دی۔

نیدرلینڈز کے شہر روٹرڈیم میں کھیلے گئے میچ میں پاکستان کے کپتان بابر اعظم نے ٹاس جیت کر پہلے بیٹنگ کا فیصلہ کیا۔

پاکستان نے پہلےکھیلتے ہوئے مقررہ 50 اوورز میں 6 وکٹ کے نقصان پر 314 رنز بنائے۔

پاکستان کی جانب سے اننگز کے آغاز میں اوپنر امام الحق محض دو رنز پر پویلین واپس لوٹ گئے۔

ان کے بعد فخر زمان اور بابر اعظم نے ذمہ دارانہ بیٹنگ کی، فخرزمان 109 رنز بناکر نمایاں رہے جب کہ بابراعظم نے 74 رنز اسکور کیے، شاداب خان نے 28 گیندوں پر 48 رنز کی ناقابل شکست اننگز کھیلی۔

نیدرلینڈز کی جانب سے باسڈی لیڈے اور لوگان وین بیک نے دو، دو وکٹیں حاصل کیں۔

315 رنز کے تعاقب میں نیدر لینڈز کی ٹیم مقررہ 50 اوورز میں 8 وکٹ پر 298 رنز بناسکی۔

میزبان ٹیم کی جانب سے وکرم جیت سنگھ اور ٹام کوپر 65 ،65 رنز بناکر نمایاں رہے، کپتان اسکاٹ ایڈورڈز نے 71 رنز کی ناقابل شکست اننگز کھیلی۔

پاکستان کی جانب سے حارث رؤف اور نسیم شاہ نے 3 ،3 کھلاڑیوں کو پویلین روانہ کیا جب کہ محمد وسیم اور محمد نواز نے ایک ایک وکٹ حاصل کی، فخرزمان کو مین آف دی میچ کا ایوارڈ دیا گیا۔

واضح رہے کہ دونوں ٹیموں کے درمیان 3 ایک روزہ میچز کھیلے جائیں گے، دوسرا میچ 18 اگست اور تیسرا 21 اگست کو کھیلا جائے گا۔