16 اگست ، 2022
پاکستانی اداکار منیب بٹ نے سابق وزیر اعظم عمران خان سے دیگر فنکاروں کے ہمراہ لائیو سیشن کے دوران کئی سوالات کیے جس کی ویڈیوز انہوں نے اپنے ٹوئٹر اکاؤنٹ پر شیئر کیں۔
اپنی بات کا آغاز کرتے ہوئے اداکار نے عمران خان سے مخاطب ہوتے ہوئے کہا 'میں آپ کا 2009 سے مداح ہوں جب آپ اقرا یونیورسٹی میں لیکچر دینے آئے تھے، ایم کیو ایم کا مشکل دور بھی گزارا اور آپ کا ساتھ دیا انشاء اللہ آگے بھی دیں گے'۔
منیب نے سوال کیا کہ 'فاشسٹ حکومت جو آپ کو عدلیہ کے ذریعے ایک طرف کرنا چاہ رہی ہے، اگر یہ نہیں کر پاتی اور فاشزم میں اندھی ہوکر یہ آپ کی گرفتاری کی طرف جاتی ہے تو پی ٹی آئی کو کون لیڈ کرے گا اور کارکنان کے لیے کیا لائحہ عمل ہوگا؟'
اداکار نے دوسرا سوال کیا کہ 'آپ کو اسمبلی کے کئی ارکان نے چھوڑ دیا، اگلی بار کیا گارنٹی ہے کہ جن کو آپ ٹکٹ دیں گے وہ آپ کو چھوڑ کر نہیں جائیں گے اور جو اب تک گئے ان میں سے سب سے زیادہ دکھ کس کے چھوڑ کر جانے پر ہوا؟'
عمران خان نے جواب میں کہا '25 مئی کو جس طرح کا ظلم لوگوں پر کیا گیا، میں نے کبھی پاکستان میں ایسا نہیں دیکھا کہ جن شہریوں پر کوئی مقدمہ نہیں ان کے گھر رات دو دو بجے چھلانگیں مار کے پولیس جارہی ہے، فیملی پر آنسو گیس کی شیلنگ کی گئی، یہ صرف ایک ڈری ہوئی حکومت کی کوشش ہے'۔
انہوں نے کہا 'یہ ان کے حربے ہیں کہ کسی طرح عمران خان کو غدار بنادیا جائے اور اسے گرفتار کرلیا جائے، غدار وہ بنارہے ہیں جس نے اس ملک کا پیسہ چوری کیا اور باہر اربوں روپے کی پراپرٹی بناکر بیٹھے ہیں'۔
عمران خان نے منیب بٹ کے دوسرے سوال کے جواب میں کہا 'اس مرتبہ پہلی بار ارکان کو میں خود ٹکٹ دوں گا، میں نے سوچا پہلے کیوں نہیں خود ٹکٹ دیے ، اب مجھے تجربہ ہوگیا ہے کہ لوگ ضمیر فروش ہوتے ہیں، جدھر پلڑا بھاری اُدھر چلے جاتے ہیں'۔
کس رکن کی جانب سے پارٹی چھوڑنے پر دکھ کے جواب میں عمران خان نے کہا 'کچھ ارکان ایسے تھے جو کم حیثیت کے تھے اور انہیں 20، 20 کروڑ کی پیشکش کی گئی لیکن انہوں نے ناں کردیا جس کی مجھے بے حد خوشی ہے'۔
انہوں نے کہا 'افسوس اس بات کا ہوا کہ کئی لوگ میرے سامنے بیٹھ کر کہتے تھے کہ ہم آپ کے نظریے کے ساتھ ہیں اور جب پیسہ ملا تو وہ دوسری طرف چلے گئے'۔