21 اگست ، 2022 
اماراتی ہلال احمر کی جانب سے بلوچستان اور سندھ کے سیلاب متاثرین میں امداد تقسیم
21 اگست ، 2022
سندھ اور بلوچستان میں حالیہ تباہ کن بارشوں سے متاثر ہونے والے پاکستانیوں کی مدد کے لیے اماراتی ہلال احمر اور قونصلیٹ کا عملہ گزشتہ کئی ہفتوں سے سرگرم ہے۔
اماراتی ہلال احمر کی ایک ٹیم بلوچستان جبکہ دوسری سندھ میں سیلاب سے متاثرہ علاقوں میں امدادی سرگرمیاں جاری رکھے ہوئے ہے۔
ان علاقوں میں حالیہ مزید بارشوں نے لوگوں کی زندگیوں کو نہ صرف اور مشکل بنا دیا بلکہ امدادی سرگرمیاں بھی شدید متاثر ہوئی ہیں۔
حمد بخیت الرمیتی کی سربراہی میں اماراتی ہلال احمر کا وفد بلوچستان کے ساتھ ساتھ سندھ کے کئی اضلاع میں اب تک لگ بھگ 15،000 خاندانوں میں راشن اور ٹینٹ تقسیم کرچکے ہیں اور یہ سلسلہ جاری ہے۔
اماراتی ہلال احمر چیف حمد بخیت الرمیتی کا کہنا تھا کہ علاقے کے حالات کو دیکھتے ہوئے ہماری کوشش ہے کہ مزید امدادی سامان کی فراہمی کا بندوبست کیا جائے، تاہم سڑکیں ٹوٹ جانے، راستوں کی بندش اور موسم کی خرابی کے باوجود ہماری ٹیمیں مختلف علاقوں میں کام کر رہی ہیں۔
انہوں نے مزید کہا کی اماراتی ہلال احمر، اس مشکل کی گھڑی میں پاکستانی عوام کے ساتھ ہے۔
