22 اگست ، 2022 
مون سون سسٹم سندھ پر اثر انداز ہو سکتا ہے، 24 اور 25 اگست کو کراچی میں بارش کا امکان
22 اگست ، 2022
چیف میٹرولوجسٹ سردار سرفراز کا کہنا ہے کہ وسطی بھارت میں موجود مون سون سسٹم سندھ پر بھی اثر انداز ہو سکتا ہے جس کے نتیجے میں 24 اور 25 اگست کو کراچی میں بادل برس سکتے ہیں۔
سردار سرفراز کا کہنا ہے کہ ہوا کا شدید کم دباؤ ڈپریشن کی صورت میں وسطی بھارت پر موجود ہے جو بھارتی ریاست راجستھان کی جانب بڑھ رہا ہے۔
چیف میٹرولوجسٹ سردار سرفراز کے مطابق 23 اگست کو مون سون سسٹم مشرقی سندھ پر اثر انداز ہو سکتا ہے، مون سون سسٹم کے زیر اثر کراچی، وسطی و بالائی سندھ اور بلوچستان میں بارش کا امکان ہے۔
انہوں نے کہا کہ سسٹم کے دو ٹریک موسمیاتی نقشے دکھا رہے ہیں، پہلے ٹریک میں مون سون سسٹم کا رخ بالائی سندھ اور جنوبی پنجاب کی جانب بھی ہو سکتا ہے، دوسرے ٹریک میں اس کا رخ مغرب کی جانب بھی ہو سکتا ہے، مغرب کی جانب ہونے پر سسٹم سندھ میں وسیع پیمانے پر بارش کا باٰعث بن سکتا ہے۔
سردار سرفراز نے کہا کہ کراچی میں 24 سے 25 اگست کی شام تک بارش کا امکان رہے گا جبکہ بلوچستان کے شمال مشرقی اور جنوبی اضلاع میں بھی بارشیں ہو سکتی ہیں۔
