23 اگست ، 2022 
اگر حکومت نے فیصلہ کرلیا تو عمران خان کو گرفتار کرلیں گے: رانا ثنااللہ
23 اگست ، 2022
وفاقی وزیر داخلہ رانا ثنااللہ کا کہنا ہےکہ ایجنسیوں کی رپورٹ میں سامنے آیا ہےکہ شہباز گل کا بیان انفرادی عمل نہیں تھا، اگر حکومت نے فیصلہ کرلیا تو عمران خان کو گرفتار کرلیں گے۔
جیو نیوز کے پروگرام ' آج شاہ زیب خانزادہ کے ساتھ' میں گفتگو کرتے ہوئے رانا ثنااللہ کا کہنا تھا کہ شہبازگل کی مہم جوئی انفرادی عمل نہیں ایک جماعتی عمل تھا، پی ٹی آئی کا سوشل میڈیا ونگ اس کے پیچھے تھا، شہباز گل نے تفتیش میں بتایا کہ لکھا ہوا بیان تھا۔
رانا ثنااللہ کا کہنا تھا کہ اگر حکومت نے فیصلہ کرلیا تو عمران خان کو گرفتار کرلیں گے، عمران خان کی گرفتاری کی صورت میں جویہ باتیں کر رہے ہیں ایسا کچھ نہیں ہوگا۔
وفاقی وزیر داخلہ کا کہنا تھا کہ شہدا کے خلاف ٹرینڈ چلائے گئے کیا اس کی پی ٹی آئی نے مذمت کی؟ شہدا کے خلاف مہم جوئی کرنے والے پی ٹی آئی کے لوگ ہیں۔
ان کا کہنا تھا کہ پنجاب میں پی ٹی آئی کی نہیں ق لیگ اورسب سے بڑے ڈاکو کی حکومت ہے، پنجاب حکومت اس شکل میں جاری نہیں رہ سکتی، اندرون خانہ جو کہانیاں ہم سن رہے ہیں وہ بڑی عجیب ہیں، پی ٹی آئی اور ق لیگ کے درمیان نہ معاملہ چل رہا ہے اور نہ آگے چل سکتا ہے۔
