کھیل

فخر زمان کا بھارت کیخلاف اعلیٰ اسپورٹس مین اسپرٹ کا مظاہرہ،سوشل میڈیا صارفین کی تعریفیں

28 اگست ، 2022

ایشیا کپ ٹی ٹوئنٹی ٹورنامنٹ کے میچ میں پاکستان نے بھارت کو جیت کیلئے 148 رنز کا ہدف دیا۔

پاکستانی ٹیم 20 ویں اوور میں147 رنز بناکر آؤٹ ہوگئی، پاکستان کی جانب سے محمد رضوان 43 رنز بنا کر نمایاں رہے۔

بھارت کے خلاف اہم میچ میں پاکستان کے بیٹر فخر زمان نے اسپورٹس میچ اسپرٹ کی اعلیٰ مظاہرہ کیا جس پر سوشل میڈیا صارفین نے ان کی تعریفوں کے پل باندھ دیے۔

اصل میں ہوا کچھ یوں کہ پاکستانی اننگز کے چھٹے اوور میں بھارتی بولر اویش خان نے گیند کروائی جو فخرکے بلے کو معمولی سا چھوتے ہوئے بھارتی کیپر دنیش کارتھک کے ہاتھوں میں گئی۔

بھارتی ٹیم کی جانب سے فوراً اپیل نہیں کی گئی لیکن فخر زمان نے اسپورٹس مین اسپرٹ کا مظاہرہ کیا اور امپائر کے فیصلے سے پہلے ہی کریز چھوڑ دی۔فخر نے کریز چھوڑی تو امپائر نے بھی آؤٹ دے دیا۔

فخر زمان نے 6 گیندوں پر 10 رنز اسکور کیے تھے۔

پاکستانی بیٹر کے اس عمل پر سوشل میڈیا صارفین نے انہیں صادق اور امین قرار دینے کا مطالبہ کردیا۔

پاکستانی ویمن کرکٹ ٹیم کی سابقہ کپتان ثنا میر نے فخر زمان کی تعریف کرتے ہوئے ٹوئٹر پر لکھا کہ' اسٹیڈیم میں اتنے شور میں کسی کو بلے سے گیند لگنی کی آواز نہیں آئی لیکن پھر بھی انہوں نے کریز چھوڑ دی، اتنے اہم میچ میں ایسا کون کرتا؟'

ایک صارف نے لکھا کہ کوئی فخر زمان جتنا ایماندار نہ ہو جبکہ ایک نے کہا کہ سپریم کورٹ کو چاہیے کہ وہ فخر کو صادق امین ڈکلیئر کردے۔

اس کے علاوہ آئی سی سی بھی فخر زمان کی تعریف کیے بغیر نہ رہ سکا۔