06 ستمبر ، 2022 
ہیلی کاپٹر کیس: چیئرمین نیب کا عمران خان سے وصولی کیلئے ای سی پی کو خط لکھنے کا وعدہ
06 ستمبر ، 2022
قومی احتساب بیورو (نیب) کے چیئرمین آفتاب سلطان نے سابق وزیراعظم عمران خان سے ہیلی کاپٹر کیس میں وصولیوں کیلئے الیکشن کمیشن کو خط لکھنے کا وعدہ کرلیا۔
پارلیمنٹ کی پبلک اکاؤنٹس کمیٹی کا اجلاس نور عالم خان کی زیر صدارت ہوا جس میں چیئرمین نیب آفتاب سلطان سمیت دیگر حکام نے شرکت کی۔
نورعالم خان نے چیئرمین نیب کوطیبہ گل اوراس کی فیملی کوہراساں نہ کرنے کی ہدایت کی اور کہا کہ انکوائری مکمل ہونے پرطیبہ گل کے الزامات غلط ثابت ہوئے توکیس عدالت جائے گا۔
اجلاس میں رکن کمیٹی نزہت پٹھان کا کہنا تھاکہ عمران خان ہیلی کاپٹرکیس میں 7 کروڑ کے مقروض ہیں، کوئی ہزارروپے کا مقروض ہو تو الیکشن میں کاغذات قبول نہیں ہوتے، عمران خان اس بار انتخابات میں حصہ لے رہے ہیں۔
چیئرمین نیب کا کہنا تھاکہ ہیلی کاپٹرکیس میں عمران خان سے ادائیگیوں کیلئے الیکشن کمیشن کو خط لکھا جائےگا۔
ان کا کہنا تھاکہ ہیلی کاپٹرکیس میں 1800 نادہندہ افراد کی لسٹ تیارکی گئی ہے، تمام نادہندہ افراد کی لسٹ الیکشن کمیشن سمیت سب اداروں کو بھیجیں گے۔
نور عالم خان کا کہنا تھاکہ اس وقت ملک میں انتخابات ہورہے ہیں، نادہندہ افراد ادائیگی پر مجبورہوں گے، نیب فوری طور پر تمام لوگوں کی فہرست کے ساتھ الیکشن کمیشن کو خط لکھے۔
پبلک اکاؤنٹس کمیٹی نے ہیلی کاپٹرکیس میں تمام نادہندہ افراد کی فہرست طلب کرلی اور سیکرٹری الیکشن کمیشن کو اگلے اجلاس میں طلب کرلیا۔
