18 ستمبر ، 2022 
کے ایم سی ٹیکس کی وصولی، شہریوں نے کے الیکٹرک کی گاڑیوں میں کچرا ڈالنا شروع کردیا
18 ستمبر ، 2022
کراچی کے شہریوں نے بجلی بلوں میں کے ایم سی ٹیکس کی وصولی پر کے الیکٹرک کی گاڑیوں میں کچرا ڈالنا شروع کردیا۔
شہری حکومت کا ٹیکس کے الیکٹرک کے بلوں میں وصول کرنے کے اعلان کے بعد شہریوں کا شدید رد عمل سامنے آ رہا ہے۔
شہر میں جن مقامات پر کچرا موجود ہے وہاں شہریوں نے کے الیکٹرک کے شکایتی مراکز اور 118 پر کال کرکے شکایت درج کروانا شروع کردی ہیں اور احتجاجاً کے الیکٹرک کی گاڑیوں میں کچرا ڈالنے کی مہم شروع کردی ہے۔
سوشل میڈیا پر یہ مہم زور پکڑ رہی ہے کہ شہری حکومت کا ٹیکس اگر کے الیکٹرک وصول کرے گی تو گھروں، گلیوں اور محلوں میں کچرا اٹھانے کیلئے کے ایم سی والے نہ آئیں تو شہری یہ کچرا اردگرد گزرتی کے الیکٹرک کی کسی بھی گاڑی میں ڈال دیں، اگر گاڑی نہ ملے تو پوری گلی کا کوڑا جمع کرکے قریبی کے الیکٹرک سینٹر کے باہر چھوڑ دیں چونکہ اب اگر کے ایم سی کا بل کے الیکٹرک وصول کرے گی تو کچرا بھی کے الیکٹرک کے ذریعے جانا چاہیے۔
ایسے میں کراچی کے ایک علاقے کی ویڈیو سوشل میڈیا پر تیزی سے وائرل ہورہی ہے جس میں دیکھا جاسکتا ہے کہ کے الیکٹرک کی گاڑی علاقے میں پہنچتی ہے جہاں کچرا دان بھرا ہوا دکھائی دیتا ہے۔
ایک شہری اس کچرا دان سے کچرے کا شاپر اٹھا کر کچرے کی گاڑی میں ڈالنا شروع کر دیتا ہے اور اس دوران کے الیکٹرک کا گاڑی کا انچارج نیچے اتر کر اس شہری سے بات چیت کرتا ہے مگر شہری کچرا گاڑی میں بھرتا رہتا ہے۔
تھوڑی دیر بعد کے الیکٹرک کے ملازم گاڑی لے کر بھاگ جاتے ہیں۔
