21 ستمبر ، 2022 
کراچی میں بزرگ اور نوجوان اسٹریٹ کرمنل نے شہری کو لوٹ لیا
21 ستمبر ، 2022
کراچی کے علاقے پیر الاہی بخش (پی آئی بی) کالونی میں موٹرسائیکل سوار بزرگ اور نوجوان اسٹریٹ کرمنلز اسلحے کے زور پر شہری سے موبائل فون چھین کر فرار ہو گئے، دونوں ملزمان کی واردات کی سی سی ٹی وی ویڈیو وائرل ہوگئی۔
خبرکے مطابق کراچی کے علاقے پی آئی بی کالونی کے مینا بازار میں موٹر سائیکل سوار بزرگ اور نوجوان 2 اسٹریٹ کرمنلز کی شہری سے موبائل فون چھیننے کی سی سی ٹی وی ویڈیو سوشل میڈیا پر وائرل ہو رہی ہے۔
ویڈیو میں دیکھا جاسکتا ہے کہ ملزمان گلی میں بیٹھے ہوئے ایک شخص کے پاس رکتے ہیں، بزرگ موٹرسائیکل پر بیٹھا رہتا ہے، نوجوان گلی میں فون پر بات کرنے میں مصروف شہری سے موبائل فون چھینتا ہے، اس کے بعد دونوں وہاں سے فرار ہوجاتے ہیں۔
سی سی ٹی وی ویڈیو میں ملزمان کے چہرے واضح ہونے کے باوجود تاحال پولیس کی جانب سے ملزمان کی گرفتاری عمل میں نہیں لائی جا سکی ہے۔
