وقار یونس نے نسیم شاہ کو ماضی کےکس عظیم بولر سے تشبیہ دی؟

قومی کرکٹ ٹیم کے سابق کپتان اور فاسٹ بولر وقار یونس نے نوجوان فاسٹ بولر نسیم شاہ کی تعریف کرتے ہوئے انہیں ماضی کے عظیم فاسٹ بولر سے تشبیہ دے دی۔

پی سی بی کے یوٹیوب چینل پر سابق کپتان وسیم اکرم کے ہمراہ گفتگو کرتے ہوئے وقار یونس کا کہنا تھا کہ نسیم شاہ ملک کے بہترین فاسٹ بولرز میں سے ایک ہیں۔

وقار نے نوجوان فاسٹ بولر نسیم شاہ کو ماضی کے عظیم آسٹریلوی بولر ڈینس لِلی سے تشبیہ دیتے ہوئےکہا کہ نسیم شاہ کا بولنگ ایکشن بہترین ہے اور ڈینس لِلی سے ملتا جلتا ہے، ان کا رن اپ بھی شاندار ہے، سب سے  اچھی بات ان کی بولنگ کی رفتار ہے۔

اس موقع پر وسیم اکرم نے بھی نسیم شاہ کے ایکشن کی تعریف کرتے ہوئے کہا کہ نسیم شاہ کی بولنگ میں مزید بہتری آرہی ہے اور حالیہ میچز میں اچھی بولنگ کے بعد ان کے اعتماد میں بھی اضافہ ہوا ہے۔

خیال رہے کہ ڈینس لِلی کا شمار  ماضی کے خطرناک فاسٹ بولرز میں ہوتا ہے جنہوں نے 1971 سے 1984 تک آسٹریلیا کی نمائندگی کرتے ہوئے شاندار کارکردگی کا مظاہرہ کیا۔

 ڈینس لِلی نے 70 ٹیسٹ میچز میں 23.92 کی اوسط سے 355 وکٹیں حاصل کیں جب کہ 63 ایک روز میچز میں 103 کھلاڑیوں کو شکار کیا۔