14 اکتوبر ، 2022 
بابر اعظم کس بولر پر انحصار کرتے ہیں؟ حارث رؤف نے بتا دیا
14 اکتوبر ، 2022
فاسٹ بولر حارث رؤف کا کہنا ہے کہ ہر میچ میں کوشش ہوتی کے کہ اپنا امپیکٹ ڈالوں تاکہ ٹیم کو فائدہ ہو۔
کرائسٹ چرچ میں کھیلے جانے والے تین ملکی ٹئ ٹونٹی سیریز میں کے فائنل میں پاکستان نے میزبان نیوزی لینڈ کو پانچ وکٹوں سے شکست دی، پاکستان کے بولرز نے ڈیتھ اوورز انتہائی مہارت سے کیے اور کیوی بیٹرز کو جکڑ کر رکھا۔
اپنا 50 واں ٹی ٹوئنٹی انٹرنیشنل کھیلنے والے فاسٹ بولر حارث رؤف نے جنہوں نے 4 اوورز میں صرف 22 رنز دے کر دو کھلاڑیوں کو آؤٹ کیا۔
حارث رؤف نے جیو نیوز سے خصوصی گفتگو میں کہا کہ ورلڈ کپ سے قبل ایسی جیت کی بہت ضرورت تھی تاکہ ہمیں ورلڈ کپ میں آسانی ہو، کھلاڑیوں نے تین ملکی سیریز میں بہت جان ماری ہے۔
انہوں نے کہا کہ ہر میچ میں کوشش ہوتی ہے کہ پرفارم کروں اور اپنا حصہ ڈالوں، کپتان بابر اعظم مجھے جو پلان دیتے ہیں میں کوشش کرتا ہوں اس کے مطابق بولنگ کروں، بابر اعظم مجھ پر انحصار کر رہے ہوتے ہیں کہ آپ سینئر بولر ہو آپ اچھا کرو گے تو دوسرے آپ کو دیکھ کر اچھا کریں گے، کوشش ہوتی ہے کہ میچ میں امپیکٹ ڈالوں تاکہ سب کے لیے آسانی ہو۔
حارث رؤف نے کہا کہ ٹی ٹوئنٹی ورلڈ کپ کے لیے اچھی تیاری ہوئی ہے، آسٹریلیا کی کنڈیشنز بھی نیوزی لینڈ سے ملتی جلتی ہیں، بیٹرز کے ساتھ بولرز کو بھی فائدہ ہو گا، ہمیں پتہ چلے گا کہ ہم نے کہاں بولنگ کرنی ہے۔
