فیکٹ چیک: عمران خان کی رات کے وقت اپنی گاڑی کیطرف چل کر آنے کی ویڈیو پرانی ہے

بہت سارے سوشل میڈیا اکاؤنٹس نے یہ دعویٰ کیا ہے کہ سابق وزیراعظم عمران خان جمعرات کی رات ٹانگ پر گولی لگنے کے باوجود خود اسپتال سے باہرچل کر آئے۔

یہ دعویٰ بالکل غلط ہے۔

جمعرات کی شام پاکستان تحریک انصاف کے چیئرمین عمران خان پر اس وقت فائرنگ کی گئی جب ان کا حکومت مخالف احتجاجی قافلہ پنجاب کے شہر وزیر آباد پہنچا۔ عمران خان کی ٹانگ پر زخم آئے تھے اورگزشتہ رات شوکت خانم اسپتال لاہور لے جایا گیا۔

دعویٰ

اس حملے کے فوراً بعد ایک ویڈیو سوشل میڈیا پر گردش کرنے لگی جس میں عمران خان کو اپنے سپورٹرز، پولیس اور میڈیا کے ہمراہ اپنی گاڑی کی طرف آتے ہوئے دیکھا جا سکتا ہے۔

کئی اکاؤنٹس نے دعوٰی کیا کہ یہ ویڈیو کل رات کی ہے جب عمران خان کو اسپتال لے جایا گیا تھا۔

ایک ٹوئٹر صارف نے لکھا کہ ’عمران خان کو گولی لگی تھی‘ آپریشن ہوا اور ایک گھنٹے بعدوہ دونوں ٹانگوں پر چلنے لگے...کیا مذاق ہے‘۔

ایک اور سوشل میڈیا اکاؤنٹ نے یہی ویڈیو شیئر کی اور پوچھا کہ ’دنیا کا کوئی ڈاکٹر بتا سکتا ہے کہ ٹانگ میں دو گولیاں لگنے کے بعد بندہ اس طرح خود چل کر آرام سے گاڑی میں بیٹھ سکتا ہے’۔

اس ویڈیو کو10 ہزار سے زائد مرتبہ دیکھا گیا۔

حقیقت

یہ ویڈیو پرانی ہے جو جمعرات کی شب کی نہیں۔

اس ویڈیو میں عمران خان کے پیچھے جو عمارت نظر آ رہی ہے وہ پاکستان سول ایوی ایشن اتھارٹی کی ہے نہ کہ شوکت خانم اسپتال کی۔

جیو فیکٹ چیک نے اس بات کی مزید تصدیق کرنے کیلئے شوکت خانم اسپتال کے ایک سینئر ملازم سے بھی رابطہ کیا۔

انہوں نے نام ظاہر نہ کرنے کی شرط پر جیو فیکٹ چیک کو بتایا کہ ’ابھی تک ایڈمٹ ہیں، رات وہ ایڈمٹ ہوا ہے، اس کا آپریٹ وغیرہ ہوا ہے، وہ ابھی ادھر ہی ہیں اور شاید آج بھی ادھر ہی رہیں گے فی الحال تو ابھی بعد میں جونئی ڈویلپمنٹ کریں تو پتہ نہیں ہے، ”but tonight he is here “

نوٹ: ہمیں @GeoFactCheck پر فالو کریں۔

اگر آپ کو بھی کسی غلط کا پتہ چلے تو ہم سے [email protected] پر رابطہ کریں۔