ارجنٹینا سے فتح پر سعودی کھلاڑی کو ’رولز رائس‘ ملنے کی خبریں، ہیڈکوچ کا ردعمل آگیا
28 نومبر ، 2022
فٹ بال ورلڈکپ میں سعودی عرب کے ہاتھوں ارجنٹینا کو شکست کے بعد خبریں سرگرم تھیں کہ اس تاریخی فتح کے بعد سعودی ولی عہد محمد بن سلمان نے ہر کھلاڑی کو مہنگی ترین گاڑی رولز رائس تحفے میں دینے کا اعلان کیا ہے تاہم اب سعودی فٹبال ٹیم کے ہیڈ کوچ کی جانب سے ان خبروں کی تردید کردی گئی ہے۔
غیر ملکی خبر رساں ادارے کے مطابق سعودی کوچ ہرو رینارڈ نے ان افواہوں پر ردعمل کا اظہار کرتے ہوئے کہا کہ ’ہماری فیڈریشن اور وزارت کھیل سنجیدہ ہے اور یہ ان چیزوں کیلئے مناسب وقت نہیں ہے‘۔
سعودی کوچ کا مزید کہنا تھا کہ میں نے ارجنٹینا سے میچ سے قبل اپنی پریس کانفرنس میں کہا تھا کہ ارجنٹینا سے ہمارا ہونے والا میچ تینوں میچز میں انتہائی اہم ہے۔
دوسری جانب سعودی عرب کی فٹ بال ٹیم کے کھلاڑی صالح الشہری بھی ارجنٹینا سے میچ کی فتح کے بعد ٹیم ممبران کو مہنگی گاڑیاں ملنے کی خبر کو مضحکہ خیز قرار دے چکے ہیں۔
واضح رہے کہ فیفا ورلڈکپ 2022 میں سعودی عرب نے ارجنٹینا کو ایک مقابلے میں دو گولز سے ہرادیا تھا جبکہ دوسرے میچ میں سعودی عرب کو پولینڈ سے شکست کا سامنا کرنا پڑا۔
