ملک میں کوئی معاشی ایمرجنسی نہیں لگائی جارہی: مصدق ملک

وزیرمملکت مصدق ملک کا کہنا ہےکہ ملک میں کوئی معاشی ایمرجنسی نہیں لگائی جا رہی اور نہ ہی اس بارے میں سوچا جا رہا ہے۔

اسلام آباد میں میڈیا سےگفتگو میں وزیرمملکت پیٹرولیم مصدق ملک کا کہنا تھا کہ حکومتی سطح پر معاشی ایمرجنسی لگانے سے متعلق غور نہیں کیا جا رہا، پاکستان نے چند روز پہلے سکوک بانڈز کی مد میں ایک ارب ڈالر ادا کیے ہیں،مزید 3 ارب ڈالر رول اوور ہونے جارہے ہیں۔

روس سے تیل خریدنےکے معاملے پر وزیر مملکت کا کہنا تھا کہ روس سے تیل خریداری کے لیے امریکی پابندیوں کا سامنا نہیں ہوگا، پی ٹی آئی روس سے تیل خریداری کی صرف باتیں کرتی تھی، روس سے ہماری بات چیت کے منٹس موجود ہیں،عمران خان لفافہ نکال کرجو بھی کہہ دیں سچ بن جاتا ہے۔

مصدق ملک کا کہنا تھا کہ جو روس سے بات چیت ہوئی وہ بتادی ہے، اگرکوئی کہتا ہے کہ روس تیل نہیں دے رہا تو کیا کہہ سکتا ہوں، روسی وفد بات چیت کے لیے 20 جنوری کو آئےگا، ایسے ہوا میں کہہ دینے سے معاہدہ نہیں ہوجاتا۔