14 دسمبر ، 2022 
مجھے اختیار ہے جب چاہوں پرویزالہٰی کو اعتماد کا ووٹ لینے کا کہہ سکتا ہوں: گورنرپنجاب
14 دسمبر ، 2022
گورنر پنجاب بلیغ الرحمان نے کہا ہے کہ پرویز الہٰی کے پاس اسمبلی تحلیل کرنے کی سمری بھیجنے کا آئینی حق ہے لیکن میرے پاس بھی اختیار ہے کہ جب چاہوں وزیراعلیٰ پنجاب پرویزالٰہی کو اعتماد کا ووٹ لینے کا کہہ سکتا ہوں۔
گورنر بلیغ الرحمان نے غیر ملکی میڈیا سے وابستہ صحافیوں کے وفد سے ملاقات کی اور کہا کہ امید ہے عمران خان ماضی کی طرح اسمبلیوں کی تحلیل پر بھی یوٹرن لیں گے، وہ یوٹرن کے ماہر ہیں، پہلے اسمبلیاں توڑنے کا اعلان تو کریں جس کی کوئی امید نہیں۔
ان کا کہنا تھاکہ پرویز الٰہی اسملبی نہیں توڑنا چاہتے ہیں، پرویزالٰہی کے پاس اسمبلی تحلیل کرنےکی سمری بھیجنے کا آئینی حق ہے اور بطورگورنر سمری وصول ہونے کے بعد 48 گھنٹوں میں فیصلہ کروں گا۔
گورنرپنجاب کا کہنا تھاکہ مسلم لیگ ن کے پاس تحریک عدم اعتماد پیش کرنے کا اختیار ہے، میں کسی بھی وقت وزیراعلیٰ کو اعتماد کا ووٹ لینے کا کہہ سکتا ہوں، مسلم لیگ ن اور اتحادی جماعتیں انتخابات سے گھبرانے والی نہیں ہیں، ہم ہر وقت عوام کے پاس جانے کو تیار ہیں۔
انہوں نے کہا کہ صدر مملکت میرے مہمان ہیں، ان سے ملاقات ہوتی ہے تو باتیں بھی ہوتی ہیں، حکومت اوراپوزیشن میں بیک ڈور رابطے بھی ہوتے ہیں، بیک ڈور مذاکرات کی باتیں پبلک نہیں کر سکتا، صدر مملکت اور اسحاق ڈار کے درمیان رابطہ ہوا ہے۔
نواز شریف کے حوالے سے گورنرپنجاب کا کہنا تھاکہ نواز شریف اپنا علاج مکمل ہونے پر جلد پاکستان آ جائیں گے۔
ان کا کہنا تھاکہ ہمیشہ دھیمے لہجے میں رہتا ہوں لیکن اسے کمزوری نہ سمجھا جائے جہاں ضرورت پڑی رویہ جارحانہ بھی کر سکتا ہوں۔
