14 جنوری ، 2023 
بابر اعظم مار دھاڑ کیلئے جائیں گے تو ان کا نیچرل ٹیلنٹ ضائع ہوگا: اظہر الدین
14 جنوری ، 2023
بھارتی کرکٹ ٹیم کے سابق کپتان محمد اظہر الدین نے پاکستانی صحافیوں سے گفتگو میں کہا ہے کہ بابر اعظم کا اپنا اسٹائل ہے، مار دھاڑ ان کا کھیل نہیں ہے، اگر بابر اعظم مار دھاڑ کیلئے جائیں گے تو ان کا نیچرل ٹیلنٹ ضائع ہوگا۔
ابوظبی میں صحافیوں سے گفتگو میں اظہر الدین نے کہا کہ ہر پلیئر کا اہم ہتھیار اس کا نیچرل ٹیلنٹ ہوتا ہے، اگر کوئی کھلاڑی اپنی قدرتی صلاحیت سے ہٹنے کی کوشش کرے گا تو ناکامی کا خدشہ رہے گا۔
انہوں نے کہا کہ بابر اور رضوان پاکستان کیلئے اہم پلیئرز ہیں، بابر کو اپنی بیٹنگ پوزیشن کے بارے میں سوچنا پڑے گا، بابر اعظم اچھے پلیئر ہیں لیکن وہ قدرتی اوپننگ بیٹسمین نہیں ہیں، ہر آدمی سیکھتا ہے، بابر اعظم کو بطور کپتان مزید وقت ملنا چاہیے۔
اظہر الدین نے مزید کہا کہ اتنی جلدی کسی کپتان کو جج کرنا ٹھیک نہیں ہوتا، ہر کوئی وقت کے ساتھ سیکھتا ہے، بابر بھی سیکھ جائیں گے، پاکستان کے بولرز کافی اچھے ہیں مگر ان کو فٹنس پر دھیان دینا ہوگا، انجری کے بعد اچھے سے اچھے بولرز کیلئے کم بیک مشکل ہوجاتا ہے۔
بھارتی کپتان نے کہا کہ انگلینڈ نے ان دنوں کافی اچھی کرکٹ کھیلی ہے، انگلینڈ کی کرکٹ کو دیکھ کر کافی مزہ آیا، کرکٹ ورلڈ کپ میں کافی وقت ہے، اس سے پہلے ٹیموں کو بہت میچز کھیلنا ہیں۔
مزید خبریں :
جیو نیوز پوڈکاسٹ: کون ہے ہمارا پہلا مہمان؟
28 نومبر ، 2024
