18 جنوری ، 2023 
حکومت الیکشن سے پہلے عمران خان کو گرفتارکرسکتی ہے: اسدقیصر
18 جنوری ، 2023
سابق اسپیکر قومی اسمبلی اور رہنما پاکستان تحریک انصاف(پی ٹی آئی) اسد قیصرکا کہنا ہےکہ حکومت الیکشن سے پہلے عمران خان کو گرفتار کرسکتی ہے، مگر پی ٹی آئی کو کوئی پروا نہیں ہے۔
جیو نیوز کے پروگرام 'کیپٹل ٹاک' کے میزبان حامد میر سے خصوصی گفتگو کرتے ہوئے اسد قیصرکا کہنا تھا کہ اگر حکومت عمران خان کوگرفتارکرنےکا منصوبہ بنا رہی تو اس سے تحریک انصاف مزید طاقت ور ہوگی۔
اسد قیصرکا کہنا تھا کہ حکومت پی ٹی آئی کے خلاف جتنے اقدامات کرےگی اس کے بدلے میں تحریک انصاف کو اتنی ہی طاقت ملےگی۔
سابق اسپیکر قومی اسمبلی نے پی ٹی آئی کے 35 ارکان قومی اسمبلی کے استعفوں کی منظوری کو اسپیکر کی ناانصافی قرار دے دیا ۔
ان کا کہنا تھا کہ راجہ پرویز اشرف نے انہیں خود اسمبلی میں واپسی کی دعوت دی اور اس کے بعد استعفے قبول کرلیے، مگر اس کے باوجود تحریک انصاف اس اقدام کو عدالت میں چیلنج نہیں کرےگی۔
