30 جنوری ، 2023 
زرداری پر عمران کے قتل کی سازش کا الزام، اسلام آباد پولیس نے شیخ رشید کو طلب کر لیا
30 جنوری ، 2023
سابق صدر آصف علی زرداری پر چیئرمین پاکستان تحریک انصاف عمران خان کے قتل کی سازش کے الزام سے متعلق کیس میں اسلام آباد پولیس نے سابق وزیر داخلہ شیخ رشید کو آج طلب کر لیا۔
چیئرمین تحریک انصاف عمران خان نے 27 جنوری کو الزام عائد کیا تھا کہ سابق صدر آصف علی زرداری نے مجھے قتل کرنے کے لیے دہشتگردوں کو رقم فراہم کر دی ہے اور اس سازش میں طاقتور حلقے بھی شامل ہیں۔
اس معاملے پر سابق صدر آصف علی زرداری نے عمران خان کے خلاف 10 ارب روپے ہرجانے کا دعویٰ دائر کرتے ہوئے ثبوت مانگ لیے ہیں۔
دوسری جانب اسلام آباد پولیس نے اسی معاملے پر سابق وزیر داخلہ شیخ رشید کو ریکارڈ سمیت طلب کر لیا ہے، شیخ رشید کو آج شام 5 بجے تھانہ آبپارہ میں طلب کیا گیا ہے۔
یاد رہے کہ شیخ رشید نے بھی ایک پریس کانفرنس کے دوران سابق صدر آصف علی زرداری پر عمران خان کے قتل کی سازش کے الزامات عائد کیے تھے۔
