30 جنوری ، 2023 
خودکش حملہ آورکیسے پولیس لائنز میں داخل ہوگیا؟ وزیراعظم آئی جی کے پی پر برہم
30 جنوری ، 2023
وزیراعظم شہباز شریف نے پولیس لائنز پشاور کی مسجد میں خودکش دھماکے پر آئی جی خیبر پختونخوا (کے پی) پر برہمی کا اظہار کیا ہے۔
خیال رہےکہ پشاور پولیس لائنز کی مسجد میں خودکش دھماکے میں شہید ہونے والوں کی تعداد 59 ہوگئی ہےجب کہ 140 سے زائد افراد زخمی ہیں۔
دھماکےکے بعد وزیراعظم شہباز شریف اور آرمی چیف جنرل عاصم منیر پشاور پہنچے، انہوں نے لیڈی ریڈنگ اسپتال جا کر زخمیوں کی عیادت بھی کی۔
وزیراعظم شہباز شریف نے پولیس لائنز مسجد میں دھماکے پر سخت برہمی کا اظہارکیا اور آئی جی خیبر پختونخوا معظم جاہ انصاری سے استفسار کیا کہ خود کش حملہ آور کیسے پولیس لائنز میں داخل ہوگیا ؟ پولیس لائنز میں داخلےکا ایک ہی گیٹ ہے، حملہ آور کہاں سے آیا؟
آئی جی معظم جاہ انصاری نے بتایا کہ پولیس لائنز میں فیملی کوارٹرز بھی ہیں،کیا پتہ حملہ آورکہاں سے آیا اورکیسے داخل ہوگیا؟ ہوسکتا ہےکہ حملہ آور پہلے سے ہی اندر ہی رہ رہا ہو ، تحقیقات کر رہے ہیں کہ واقعہ کیسے پیش آیا اور حملہ آور کیسے داخل ہوا؟
