14 فروری ، 2023 
افتتاحی میچ میں فتح، لاہور قلندرز نے کھلاڑیوں پر انعامات کی برسات کردی
14 فروری ، 2023
پاکستان سپر لیگ (پی ایس ایل) کی ٹیم لاہور قلندرز نے 8 ویں ایڈیشن کے افتتاحی میچ میں شاندار کارکردگی کا مظاہرہ کرنے والے کھلاڑیوں پر انعامات کی برسات کردی۔
لاہور قلندرز نے پیر کی شب ملتان کرکٹ اسٹیڈیم میں پی ایس ایل کے افتتاحی میچ میں ملتان کو ایک رن سے شکست دی تھی، اس میچ میں قلندرز کی جانب سے فخر زمان مین آف دی میچ قرار پائے۔
میچ کے بعد قلندرز کے سی او او اور ٹیم منیجر ثمین رانا نے اپنی روایت کو برقرار رکھتے ہوئے کھلاڑیوں کو سراہا اور ان کیلئے انعامات کا اعلان کیا۔
ثمین رانا نے مین آف دی میچ اور قلندرز کی جانب سے 2000 پی ایس ایل رنز مکمل کرنے والے فخر زمان کیلئے قلندرز سٹی میں پلاٹ اور بہترین فیلڈنگ کا مظاہرہ کرنے و الے حسین طلعت کیلئے جدید آئی فون کے انعام کا اعلان کیا۔
ثمین رانا نے کھلاڑیوں کی کارکردگی کو سراہا، انہوں نے نوجوان زمان خان اور پہلی مرتبہ قلندرز کی نمائندگی کرنے والے زمبابوے کے کرکٹر سکندر رضا بٹ کی بھی تعریف کی۔
دوسری جانب ملتان میں پہلا میچ جیتنے کے فوری بعد لاہور قلندرز کی ٹیم کراچی روانہ ہوئی، کراچی پہنچنے کے بعد قلندرز نے آج ایک روز آرام کیا جبکہ کل سے ان کے پریکٹس سیشن کا آغاز ہوگا۔
لاہور قلندرز کی ٹیم اگلا میچ کراچی میں کراچی کنگز کیخلاف کھیلے گی۔
