14 فروری ، 2023 
کراچی: نجی کمپنی کا سکیورٹی گارڈ اسٹریٹ کرائم، منشیات فروشی اور قتل میں ملوث نکلا
14 فروری ، 2023
نیو ٹاؤن پولیس نے کاروائی کے دوران قتل، منشیات فروشی اور اسٹریٹ کرائمز میں ملوث ہونے کے الزام میں ایک سکیورٹی گارڈ کو گرفتار کر لیا ہے۔
ایس ایس پی ایسٹ زبیر نذیر شیخ کے مطابق نجی سکیورٹی گارڈ محمد دین ولد ولی گل کی گرفتاری غیرقانونی اسلحہ سمیت عمل میں آئی، ملزم محمد دین کا ایک سہولت کار اور ایک ساتھی ساحل عرف سعود پہلے ہی جیل میں ہیں۔
زبیر نذیر شیخ کے مطابق گرفتار سکیورٹی گارڈ قتل، ناجائز اسلحے، منشیات فروشی اور ڈکیتیوں سمیت دیگر سنگین جرائم میں ملوث ہے، ملزم نے منگھو پیر کے علاقے میں 13 جون 2022 کو پیٹرول پمپ پر ساتھیوں سمیت ڈکیتی کی دوران محمد حسین کو قتل کردیا تھا، ملزم کے خلاف تھانہ منگھوپیر پر مسلم خان کی مدعیت میں مقدمہ درج ہے۔
پولیس کے مطابق اطلاع ملنے پر ایس ایچ او نیو ٹاؤن محمد سعود نے چھاپہ مار کارروائی کرتے ہوئے ملزم محمد دین کو گرفتار کیا، ملزم کے خلاف مقدمہ درج کرلیا گیا ہے۔
پولیس کا کہنا تھا کہ بغیر پولیس تصدیق کے ملزم کو ملازمت پر رکھنے کے حوالے سے نجی سکیورٹی کمپنی کے عہدیداروں سے بھی تفتیش کی جا رہی ہے۔
