22 فروری ، 2023 
پاکستان ٹیم کیلئے کھیلنا ہر کسی کا خواب ہوتا ہے، میرا بھی ہے: صائم ایوب
22 فروری ، 2023
پاکستان سپر لیگ (پی ایس ایل) کی ٹیم پشاور زلمی کے نوجوان بیٹر صائم ایوب نے کہا ہے کہ پاکستان ٹیم کیلئے کھیلنا ہر کسی کا خواب ہوتا ہے، میرا بھی ہے، پراسس کو فالو کررہا ہوں، جب موقع ملا تب ضرور کھیلوں گا، فی الحال میرا فوکس پی ایس ایل ہے، اس سے آگے کا نہیں سوچ رہا۔
جیو نیوز سے گفتگو کرتے ہوئے صائم ایوب نے کہا کہ اچھی اننگز کھیل کر اعتماد ملتا ہے لیکن کوشش کروں گا کہ اگلی بار میچ وننگ اننگ کھیلوں، میرا ہدف اپنی ٹیم کیلئے میچ وننگ پلیئر بننا ہے، کوشش ہوگی کہ زیادہ سے زیادہ رنز کروں اور ٹیم کو میچز جتواؤں، اگر ٹیم کو جتوانے میں کامیاب رہا تو میرا مقصد مکمل ہوجائے گا۔
انہوں نے کہا کہ ہماری ٹیم میں بابر اعظم اور سیمی جیسے لوگ موجود ہیں، بابر نوجوان کرکٹرز کو بہت سپورٹ کرتے ہیں، جب کوئی مشکل ہوتی ہے تو ان ہی سے پوچھتا ہوں کہ کیا کرنا ہے، ان سینیئرز سے بہت کچھ سیکھنے کی کوشش کررہا ہوں۔
صائم ایوب کا کہنا تھا کہ سینیئرز سے سیکھتا ہوں کہ میچ کی کس صورتحال میں کیا کرنا ہے، جو جو سیکھتا رہوں گا وہ ٹورنامنٹ میں اپلائی کرتا رہوں گا۔
