06 مارچ ، 2023 
کسٹم انٹیلی جنس نے گوبر میں چھپائی گئی چھالیہ پکڑ لی
06 مارچ ، 2023
ڈائریکٹوریٹ آف انٹیلی جنس اینڈ انویسٹی گیشن کسٹمز کراچی کی انسداد اسمگلنگ ٹیم نےگوبر کی آڑ میں مضر صحت چھالیہ اسمگل کرنے کی کوشش کو ناکام بنا دیا۔
کسٹم انٹیلی جنس نے ناردرن بائی پاس سے کراچی شہر جانے والے ایک بیڈ فورڈ ٹرک کو قبضے میں لے کر جانوروں کے گوبر کی آڑ میں مضر صحت چھالیہ بر آمد کرلی۔
ذرائع کے مطابق زیر حراست مضر صحت چھالیہ اور ٹرک کی مالیت 1 کروڑ روپے سے زائد ہے۔
اطلاع ملنے کے بعد کراچی شہر کی طرف آنے والی ایسی گاڑیوں کی نقل و حرکت پر خفیہ نگرانی کی گئی، نتیجتاً، ایک بیڈ فورڈ ٹرک جس کا رجسٹریشن نمبر AE-0071 تھا ناظم آباد روڈ پر دیکھا گیا اور ڈرائیور کو رکنے کا اشارہ کیا گیاجس پر اس نے فرار ہونےکی کوشش کی لیکن پیچھا کرنے پر اسے روک لیا گیا۔
ٹرک پر لوڈ کے بارے میں پوچھنے پر ڈرائیور نے جواب دیا کہ اس نے شہر کے نرسری ایریا میں ترسیل کے لیے ناردرن بائی پاس کے علاقے سے جانوروں کا گوبر لوڈ کیا ہے،ڈرائیور کے جواب سے مطمئن نہ ہونے پر مذکورہ ٹرک کو تحویل میں لے لیا گیا اور اسے کسٹمز انٹیلی جنس ہیڈ کوارٹر لایا گیا۔
جانوروں کے گوبر کو اتارنے کی سخت مشق کے دوران مضر صحت چھالیہ کے 280 تھیلے برآمد ہوئے جنہیں جانوروں کے گوبر کے نیچے رکھا گیا تھا۔
ٹیم نے مقدمہ درج کر کے اسمگل شدہ مضر صحت چھالیہ سمیت ٹرک کو قبضے میں لے لیا ہے۔
