کاروبار

رمضان میں پنجاب کے ایک کروڑ 58 لاکھ گھرانوں کو مفت آٹا ملے گا: وزیراعظم

13 مارچ ، 2023

وزیراعظم نے عوامی سہولت کیلئے آٹے کی تقسیم کے مزید 20 ہزارپوائنٹس قائم کرنے کی بھی ہدایت کی ہے— فوٹو: فائل

وزیراعظم شہباز شریف نے اعلان کیا ہے کہ رمضان المبارک میں پنجاب بھرکے ایک کروڑ 58 لاکھ گھرانوں کو مفت آٹا دیا جائے گا۔

رمضان پیکج سے متعلق منعقدہ اجلاس میں خطاب کرتے ہوئے وزیراعظم شہباز شریف نے کہا کہ مفت آٹے کی تقسیم 25 شعبان سے 25 رمضان المبارک تک یوٹیلٹی اسٹورز کے ذریعے کی جائے گی۔

وزیراعظم نے عوامی سہولت کیلئے آٹے کی تقسیم کے مزید 20 ہزارپوائنٹس قائم کرنے کی بھی ہدایت کی ہے اور کہا ہے کہ مفت آٹے کی تقسیم شفاف طریقے سے یقینی بنائی جائے۔

وزیرِ اعظم نے سندھ، خیبرپختونخوا اور بلوچستان کو بھی مفت آٹا اسکیم میں شمولیت کی دعوت دی۔

وزیر اعظم محمد شہباز شریف نےکہا ہے کہ ملکی تاریخ میں پہلی بارغریب عوام کیلئے رمضان میں مفت آٹے کی فراہمی کا پیکج تیار کیا گیا ہے، آٹے کی فراہمی کے دوران چوری روکنے کیلئے جدید ٹیکنالوجی کا استعمال کیا جائے۔

وزیراعظم آفس کی جانب سے جاری بیان کے مطابق وزیراعظم شہباز شریف کی زیر صدارت رمضان پیکج کے تحت مفت آٹے کی فراہمی پر جائزہ اجلاس میں نگران وزیراعلیٰ پنجاب سید محسن رضا نقوی، مشیر وزیراعظم احمد چیمہ اور متعلقہ اعلیٰ حکام نے شرکت کی۔

وزیراعظم نے کہا کہ مفت آٹے کے معیار پر کسی قسم کا سمجھوتہ قبول نہیں، مفت آٹا اسکیم میں شہری اپنی اہلیت ایس ایم ایس کے ذریعے جانچ سکیں گے۔

انہوں نے کہاکہ وفاقی حکومت دیگر صوبوں کو بھی اس پروگرام میں معاونت فراہم کرے گی۔