27 مارچ ، 2023 
ملتان: جیولری شاپ پر ڈکیتی کے دوران شہریوں کے ہتھے چڑھے تین ڈاکو تشدد سے ہلاک
27 مارچ ، 2023
ملتان میں جیولر کی دکان پر ڈکیتی کے دوران شہریوں کے ہتھے چڑھنے والے تینوں ڈاکو تشدد سے ہلاک ہو گئے۔
پولیس کے مطابق ملتان کے علاقے گلگشت میں جیولرکی دکان میں ڈکیتی مزاحمت پر ڈاکوؤں کی فائرنگ سے ایک شخص جاں بحق اور دو افراد زخمی ہوئے تھے۔
پولیس کا بتانا ہے کہ شہریوں نے فرار ہونے والے ڈاکوؤں کو پکڑ کر شدید تشدد کا نشانہ بنایا، پکڑے جانے والے تینوں ڈاکو زخموں کی تاب نہ لاتے ہوئے نشتر اسپتال میں دم توڑ گئے۔
سوشل میڈیا پر وائرل ویڈیو میں دیکھا جا سکتا ہے کہ شہریوں نے پکڑنے جانے والے تینوں ڈاکوؤں کو رسیوں سے باندھ رکھا ہے اور تینوں زمین پر ادھ موئے پڑے ہیں، پاس کھڑے ایلیٹ فورس اور پنجاب پولیس کے اہلکار عوام کو روکنے کی کوشش کر رہے ہیں تاہم بڑی تعداد میں ہجوم پولیس کی بات کو سنے بغیر ڈاکوؤں کو تشدد کا نشانہ بنا رہا ہے۔
