26 اپریل ، 2023 
انسانی حقوق کمیشن پاکستان نے عمران خان کیخلاف تحریک عدم اعتماد کو آئینی قرار دے دیا
26 اپریل ، 2023
انسانی حقوق کمیشن پاکستان نے سال 2022 کے بارے میں اپنی سالانہ رپورٹ میں عمران خان کے خلاف تحریک عدم اعتماد کو آئینی عمل قرار دے دیا اور کہا کہ عدلیہ کو اس بات کا اختیار نہیں کہ وہ سیاسی جماعتوں کو مذاکرات کا حکم دے۔
سال 2022 میں عمران خان تحریک عدم اعتماد کا ووٹ ہار گئے ، اس سے قبل سپریم کورٹ نے ڈپٹی اسپیکر کی تحریک عدم اعتماد کے خلاف رولنگ غیر آئینی قراردی۔ یہ سب کہا انسانی حقوق کمیشن کی چیئرپرسن حنا جیلانی نے، پاکستان میں انسانی حقوق سے متعلق سالانہ رپورٹ کے اجرا کے بعد پریس کانفرنس سے خطاب اور جیو نیوز سے گفتگو میں انہوں نے کہا کہ تحریک عدم اعتماد میں ایجنسیوں کے کردار کا کوئی ثبوت نہیں ملا۔
کمیشن کی چیئرپرسن نے جبری گمشدگیوں، آزادی اظہار، اقلیتوں اور ٹرانس جینڈرز کے خلاف انسانی حقوق کی خلاف ورزیوں کی کھلے الفاط میں مذمت کی۔
انسانی حقوق کمیشن نے سول سوسائٹی پر پابندیوں کے بارے میں بھی حکومت کو آڑے ہاتھوں لیااور کہا کہ سول سوسائٹی کو ریاست کی طرف سے سختیوں کا نشانہ بنایا جارہا ہے ۔
