نظر انداز کی جانیوالی وہ 6 علامتیں جو کینسر کی طرف اشارہ کرتی ہیں

کینسر جیسے موذی مرض کی یوں تو کئی علامتیں ہوتی ہیں لیکن کیا آپ کو اس بات کا علم ہے کہ ایسی بہت سی عام علامتیں جسے ہم نظر انداز کردیتے ہیں، اگر بروقت ان پر توجہ دی جائے تو کینسر کا علاج وقت پر ہوسکتا ہے۔

برطانوی جریدے نے اپنے ایک مضمون میں وہ چھ علامتیں بتائی ہیں جو کسی بھی جسم میں کینسر ہونے کی طرف اشارہ کرتی ہیں۔

آئیے جانتے ہیں کہ یہ علامتیں کون سی ہیں جنہیں آپ کو ہرگز نظر انداز نہیں کرنا چاہیے۔

جسم کے کسی حصے پر غیر معمولی گلٹی یا سوجن:

ایسی گلٹی جو آپ جسم کے کسی حصے پر مسلسل دیکھ رہے ہوں اور وہ ختم نہ ہورہی ہو تو اسے سنجیدہ لیں۔

کینسر پر ہونے والی ایک تحقیق نے خبردار کیا ہے کہ گردن، بغلوں، پیٹ، سینے یا بریسٹ کے گرد گلٹی یا سوجن کینسر کی علامت ہوسکتی ہے۔ 

برطانیہ کی نیشنل ہیلتھ سروس نے مشورہ دیا ہے کہ اگر آپ کے جسم پر موجود گلٹی مسلسل بڑھ رہی ہو تو فوراً ڈاکٹر سے رجوع کریں۔

وزن میں کمی:

غیر ارادی طور پر وزن کم ہونا بھی کینسر کی انتباہی علامت ہو سکتی ہے۔

اگرچہ وزن میں معمولی تبدیلیاں عام بات ہے، تاہم کینسر ریسرچ نے خبردار کیا ہے کہ جو لوگ بغیر کوشش کیے نمایاں وزن کی کمی کا شکار ہوجاتے ہیں انہیں اپنے معالج سے رابطہ کرنا چاہیے۔

کینسر مختلف وجوہات کی بناء پر وزن میں کمی کا سبب بن سکتا ہے۔

مثال کے طور پر، آنتوں کے کینسر میں وزن میں کمی ٹیومر کی وجہ سے ہو سکتی ہے کیونکہ یہ آپ کو بیمار یا پیٹ پھولا ہوا محسوس کراتا ہے جس سے آپ کی بھوک کم ہوتی ہے۔

جسم کے حصوں میں درد:

جسم میں درد آپ کو یہ بتاتا ہے کہ کچھ غلط ہے، کینسر ریسرچ کے مطابق، آپ کو جسم میں کسی بھی مستقل درد کے لیے طبی مشورہ لینا چاہیے کیونکہ یہ کسی اور سنگین چیز کی علامت ہو سکتی ہے۔

درد ٹیومر کی علامت ہو سکتا ہے، مثال کے طور پر مسلسل گلے میں خراش گلے کے کینسر کی نشاندہی کر سکتی ہے اور پیٹ میں درد آنتوں کے کینسر کی علامت ہو سکتا ہے۔

خون بہنا یا زخم آنا:

بغیر چوٹ لگے خون بہنا یا زخم آنا کینسر کی انتباہی علامت ہو سکتی ہے۔

کینسر ریسرچ کے مطابق، آپ کے اسٹول یا پیشاب میں خون یا یہاں تک کہ قے یا کھانسی سے خون آنا ایسی علامات ہیں جو کینسر کی کئی اقسام میں ظاہر ہوتی ہیں۔

تھکاوٹ:

ہر وقت تناؤ محسوس کرنا یا سونے میں دشواری ہونا یا معمول سے زیادہ تھکاوٹ محسوس کرنا بھی خطرے کی گھنٹی ہے۔

ٹیومر کا اندرونی طور پر خون بہنا تھکاوٹ کا سبب بن سکتا ہے کیونکہ یہ خون کی کمی میں تبدیل ہو سکتا ہے ۔

رات بھر غیر معمولی پسینہ آنا:

کینسر کی تحقیق کے مطابق، بخار ہونا یا رات کو بہت زیادہ پسینہ آنا کسی انفیکشن کی علامت ہو سکتا ہے۔

پسینہ آنا بعض دواؤں کا اثر بھی ہو سکتا ہے، تاہم اگر آپ کو رات کو بہت زیادہ اور بھیگنے والا پسینہ آتا ہے تو آپ کو ڈاکٹر سے رجوع کرنے کی ضرورت ہے۔

نوٹ: قارئین اس حوالے سے اپنے معالج سے بھی مشورہ کریں۔